Двајцата денеска беа приведени и спроведени пред судија на претходна постапка во Основниот кривичен суд во Скопје
Креаторот и администраторот на ланската група „Јавна соба“ на платформата „Телеграм“ добија притвор од по 30 дена.
Тие беа приведени денеска и спроведени пред судија на претходна постапка во Основниот кривичен суд во Скопје од кој обвинителството побара мерка притвор.
Двајцата, со иницијали Д.К. и М.П., се осомничени за кривичното дело производство и дистрибуција на детска порнографија. Притворот, како што соопштија од судот, им е определен поради опасност од бегство, основан страв дека ќе ја попречат истрагата со влијание на сведоците и ќе го повторат или ќе го довршат кривичното дело.
Осомничените имаат право да се жалат до Кривичниот совет во судот.
Како што соопшти претходно Обвинителството, тие се осомничени дека од 19.12.2019 година до 28.01.2020 година, како основач и модератор на групата, наместо да се грижат за содржината на текстуалните и аудиовизуелните содржини што се споделуваат од членовите на групата, со умисла дозволиле во групата да се објавува аудиовизуелен материјал на кој се прикажани очигледни полови дејствија со дете.
Предистражна постапка долга една година
Со денешното отворање истрага за случајот, завршува предистражната постапка која траеше една година. Според ОЈО, биле издадени 20 наредби и барања до Министерството за внатрешни работи. По овие наредби и барања, беа доставени известувања и анализи. Оттаму велат дека поради сензитивноста на предметот и тајноста на предистражната постапка, Обвинителството не ги споделило овие податоци со јавноста.
Во денешното соопштение од ОЈО се вели дека во тек е предистражна постапка во врска со пријави од оштетени и жртви за определени членови на групата „Јавна соба“ и доколку се утврди дека е сторено кривично дело, кое се гони по службена должност, Јавното обвинителство ќе постапи согласно своите надлежности.
Обвинителството ги охрабрува оштетените и жртвите од овој и слични настани да ги пријавуваат во Министерството за внатрешни работи, кое е овластено за утврдување на идентитетот на сторителите на кривични дела, бидејќи располага со база на податоци со имиња и презимиња на сите граѓани и странци, како и нивните лични податоци, што ќе помогне да се документираат настаните и да се обезбедат релевантни докази по службена должност, а кога тоа го пропишува Законот за кривична постапка, и по наредба и барање на јавниот обвинител.
Додека обвинителството водеше предистрага за скандалозната „Јавна соба“ од лани, на почетокот на годинава се појави и „Јавна соба 2“. Во вториот случај досега се уапсени четири лица.
Што е „Телеграм“?
Зад „Телеграм“ стојат браќата Павел и Николај Дуров, едниот бизнисмен, а другиот програмер и првично е покрената во 2013 година во Русија, а потоа компанијата е префрлена во Германија.
Користењето е забрането во Кина и во Иран, а до јуни годинава беше и во Русија, кога забраната беше укината.
Својата популарност ја добива поради строгата заштита на пораките што се споделуваат, каде што има и опција за нивно самоуништување.
Според МВР, залудни биле контактите со компанијата, а барањата да ја запрат ваквата злоупотреба наишле на игнорирање.
Всушност, ова не е само во нашиот случај.
Пред неколку недели американските медиуми објавија дека Коалицијата за побезбедна мрежа поднела тужба за отстранување на „Телеграм“ од продавницата „Гугл плеј“ .
Нивните причини се дека таа била користена за организирање нередите и упадот на Капитол Хил на 6 јануари, а претходно и за ширење омраза во врска со убиството на Афроамериканецот Џорџ Флојд, кое го покрена движењето „И животите на црнците се важни“.