Судот во Прилеп го прифати предлогот на Обвинителството и одреди мерка притвор од 30 дена за дрвокрадците кои тепаа полицајци.
Претходно, Министерството за внатрешни работи поднесе кривична пријава против десете лица кои во четвртокот нападнаа пет полициски службеници на стариот пат Прилеп – Велес во близина на Чашка.
Е.Е.(28), Е.И.(30), Ф.Ќ.(37), С.А.(40), Ф.Ќ.(43), С.М.(57), Ѓ.А.(21), Р.В.(30), Е.В.(29), И.В.(52), сите од Прилеп, на 24 септември ги нападнале полициските службеници со тврди предмети и ги искршиле стаклата од полициското службено возило.
Тој ден околу 20 часот биле сопрени за проверка од страна на полициски службеници на патот Прилеп – Велес. Полицајците запреле три патнички моторни возила без регистерски ознаки, а едното возило успеало да избега.
Останатите две возила биле натоварени со огревни букови дрва, кои од страна на полициските службеници биле одземени. Притоа наишла поголема група граѓани, меѓу кои и десетте пријавени лица, кои почнале агресивно да се однесуваат и игнорирајќи ги усните наредби, со тврди предмети ги искршиле стаклата од полициското службено возило.
Првопријавениот со тврд предмет го нападнал полицискиот службеник Д.Ц., а потоа останатите пријавени ги нападнале неговите колеги, по што полициските службеници испукале неколку предупредувачки истрели во воздух и пријавените се повлекле.
Повредениот Д.Ц. бил пренесен во Комплекс клиники „Мајка Тереза“ Скопје, каде што му биле констатирани тешки телесни повреди, а четири полициски службеници се со телесни повреди.