Претставничкиот дом синоќа изгласа отповикување на претседателот Доналд Трамп од власт.
Резултатите од гласањето покажаа дека во законодавниот дом на САД постои ненадминлива поделба по партиска линија.
По првиот предмет на обвинувањето, злоупотреба на власта, „за“ гласаа 230 конгресмени, додека „против“ беа 197.
По вториот предмет, попречување на законот, „за“ гласаа 229 члена, а „против“ беа 198.
За утврдување на импичмент беа потребни гласови од најмалку 216 конгресмени.
Двајца демократи, Колин Петерсон и Џеф Ван Дру, гласаа против. Џаред Голден гласаше „за“ по првото обвинение, додека беше против за второто, додека демократката Тулси Габард беше воздржана.
Во објаснување на својот став Габард порача дека таа се позиционирала во центарот.
„Кога пред три месеци гласав за спроведување на истрагата за импичмент, кажав дека тоа не треба да стане еднопартиски проект… За жал, тоа се случи“, изјави таа.
Синоќешното гласање е уште една потврда за длабоката меѓупартиска поделеност во законодавниот дом на САД.
Претходно, само двајца американски претседатели, Ендрју Џонсон во 1868 година и Бил Клинтон во 1998 година, беа отповикани, но и двајцата останаа да ги завршат своите мандати докрај. Ричард Никсон си поднесе оставка во 1974 година, без да дочека гласање за импичмент.
Иако Претставничкиот дом објави импичмент, Трамп и понатаму е претседател. Неговата судбина сега се префрла во Сенатот на американскиот Конгрес, каде што специјално оформен суд ќе ја разгледа одлуката на Претставничкиот дом по предметите на обвинението, а бранители ќе ја докажуваат неговата невиност.
Процесот треба да го води судијата Џон Робертс, претседател на Врховниот суд на САД.
За отстранување на Трамп од должност треба да гласа една третина од сенаторите, или не помалку од 67. Процедурата се определува од лидерите во Сенатот, во кој републиканците се мнозинство.
Според Уставот, оваа фаза од процесот нема рокови.
Спикерот на Претставничкиот дом, Ненси Пелоси, синоќа по гласањето укажа дека нема брзање утврдениот импичмент да се префрли во Сенатот, сè додека демократите не добијат гаранции за продлабочен и непристрасен суд. И со оние сведоци што тие побараа лидерот на мнозинството во Сенатот, Мич Меконел, да ги повика да сведочат.
Се очекува и поинаков развој на настаните. Изјавата на Пелоси значи дека судењето во Сенатот може да се одложи, Трамп да не биде ослободен од обвинувањата и да остане етикетиран како отповикан претседател во текот на голем дел од изборната 2020 година.