Во интервју за МИА, по повод Светскиот ден на бегалците, Моника Сандри информира дека лани во државата имало 211 апликации за азил, а до крајот на мај годинава азил побарале 25 лица
Лани во државата имало 211 апликации за азил, додека, пак, до крајот на мај годинава азил побарале 25 лица.
Во време на пандемија, властите во Северна Македонија брзо воспоставија мерки, како медицински тестови, привремен карантин по пристигнување и интервјуа на далечина и како резултат на тоа луѓето на кои им беше потребна заштита можеа да поднесат барање за азил. За да се овозможи инклузија на бегалците, УНХЦР ја поддржува државата во подобрувањето на квалитетот на азилот, градење на систем за влез заснован на начелото на заштита, искоренување на бездржавјанството, подобрување на законската рамка и нејзиното спроведување, како и зајакнување на подготвеноста и одговор со цел да се спречат кризи“,
посочува во интервју за МИА претставничката на Високиот комесаријат за бегалци на Обединетите нации Моника Сандри.
Во интервјуто, по повод Светскиот ден на бегалците, таа вели дека. на светско ниво, постои зголемен број на лица кои се принудени да ги напуштат своите домови.
„Постои зголемување од 4 проценти на луѓе кои се принудени да ги напуштат своите домови, со што вкупниот број е зголемен од 79,5 милиони на крајот на 2019 година и на 82,4 милиони луѓе на крајот на 2020 година“,
вели претставничката на УНХЦР.
Според Моника Сандри, движењето не запре бидејќи во светот не престанаа војните, конфликтите, прогоните и прекршувањата на човековите права.
„На глобално ниво, 68 проценти од сите луѓе кои избегале во други земји потекнуваат од само пет држави: Сирија – 6,7 милиони, Венецуела – 4,0 милиони, Авганистан – 2,6 милиони, Јужен Судан – 2,2 милиони и Мјанмар – 1,1 милиони. Ова значи дека доколку запрат прогонот, прекршувањето на човековите права и војната во само пет земји, драматично ќе се намали бројот на раселени лица во светот“,
оценува таа.
Во моментов има 22 баратели на азил сместени во Центарот за баратели на азил во Визбегово. Центарот, како што посочува претставничката на УНХЦР, ги нуди сите услуги на кои барателите на азил имаат право, а услугите ги обезбедува персонал кој има долгогодишно искуство во работа со бегалци.
„Во Центарот за баратели на азил Визбегово има медицински тим за примарна здравствена заштита. Доколку има потреба, лекарот ги упатува барателите на азил во секундарни здравствени установи. Истото важи и за Прифатниот транзитен центар „Винојуг“; таму, бегалците на кои им е потребна лекарска помош се упатуваат во гевгелиската болница. Во овие центри, со средства од Европската Унија, обезбедивме речиси 15 тони средства за дезинфекција, автоматски апарати за дезинфекција на раце, заштитни бариери од плексиглас, прехранбени производи, мебел, обувки, постелнина и прекривки, санитарни порти за лица, санитарен тунел за возила и дополнителни контејнери за лица со специфични потреби“,
додава Сандри.