Според Димовски, не е точно дека се прекршени правата на работниците бидејќи Законот за минимална плата предвидува усогласување на платите во рок од шест месеци, па затоа во овој штрајк не станува збор за кршење туку за унапредување на правата. Претседателот на СОНК, пак, рече дека работодавците се тие што треба да им исплатат плати на штрајкувачите бидејќи, според нив, штрајкот е организиран бидејќи се кршат правата на работниците
Претседателот на Сојузот на синдикати на Македонија (ССМ), Дарко Димовски, утрово во гостувањето на „Утрински брифинг“, коментирајќи го штрајкот на СОНК во училиштата и градинките, рече дека Јаким Неделков требало да им ја каже вистината до крај на просветните работници.
Според него, не е точно тоа што го вели СОНК дека се прекршени правата бидејќи Законот за минимална плата предвидува усогласување на платите во рок од шест месеци.
„Ние на СОНК му дадовме безрезервна поддршка, но тоа беше до вчера. Вчера воопшто не ми се допадна излагањето на претседателот на СОНК, Јаким Неделков, затоа што сметам дека мораше да ја говори вистината до крај и, кога ќе ги поведе луѓето на штрајк, говорам за просветните работници, требаше да им каже што ќе се случи доколку штрајкуваат и кои се правилата на игра за време на штрајк. СОНК на чело со Јаким Неделков штрајкот го организира по основа на зголемувањето на минималната плата т.е. нејзино усогласување. Ако СОНК штрајкува по закон и ако му се прекршени правата по закон, тоа не е така. Законот вели – шест месеци има време, согласно членот од Законот за минимална плата, Владата и работодавецот да ја усогласат минималната плата или скалесто да се зголеми. Ние сме се согласиле така по колективните договори. Потребата да се случи промената што побрзо, сега и веднаш е неопходно и за тоа ние му дадовме поддршка“,
рече Димовски во „Утрински брифинг“.
Од друга страна, вели Димовски, Колективниот договор се усогласува еднаш годишно и може до 30.12. тој колективен договор да се усогласи согласно порастот на минималната плата.
Од СОНК вчера одлучија да продолжат со штрајкот и порачаа дека тоа што Владата решила со ребалансот на буџетот да се обезбедат пари за 10 отсто покачување на платите во школите и градинките, била бетонирана понудата и не се оставало простор за дополнителни преговори.
Претседателот на СОНК, Јаким Неделков, на прес-конференција читајќи ги заклучоците од Советот на синдикатот рече работодавците се тие што треба да исплатат плати на штрајкувачите бидејќи, според нив, штрајкот е организиран бидејќи се кршат правата на работниците.
„Советот на СОНК констатира дека одредени министри се обидуваат упорно да ги заплашуваат поддржувачите дека ќе им бидат скратени дневниците во деновите на штрајк што го сметаме за обид за спречување на штрајкот. Освен законското право на исплата на плата при штрајк, постојат и членови на колективните договори со кои се допрецизира исплаќањето дневници за време на штрајк и во кои се вели: ’Работодавецот е должен да исплати надоместок на плата за работниците за време на штрајк за работниците кои учествуваат во штрајкот во висина од основната плата на работникот доколку синдикатот организиран штрајк поради кршење на правата на работниците утврдени со закон, колективен договор или акт на работодавецот‘. Според тоа, не треба да се заплашуваат дека ќе им бидат скратени дневници“,
рече Неделков.