Јас би кажал дека историските разлики не смеат да бидат причина да се оспори капацитетот на земја-кандидат да продолжи на патот на пристапување кон ЕУ. Тоа е нашата позиција и сметам дека е и позиција на ЕУ, рече Левиц на заедничка прес-конференција со претседателот Пендаровски
Не е на ЕУ да решава историски прашања, таквите спорови треба да се стават на страна во процесот на пристапување кон Унијата, порача претседателот на Латвија, Егилс Левиц, од Скопје одговарајќи на новинарско прашање дали промовирањето на лик соработник на фашизмот како Ванчо Михајлов е она што треба да го прави ЕУ и дали е тоа патот по кој треба да одат земјите-членки.
„Доколку ја погледнете мапата на ЕУ ќе видите многу точки каде има разлики во однос на историјата и тоа не се случува само тука помеѓу Бугарија и Северна Македонија. Меѓутоа ЕУ не е надлежна да ги решава ниту да дискутира за тие историски прашања. Надлежноста на ЕУ е предвидена со договорот за основање на ЕУ и таму нема да најдете ништо во однос на историските спорови. Ако го погледнете процесот на пристапување, тогаш само прашањата што припаѓаат под надлежност на ЕУ треба да бидат оценети. Не е ЕУ таа што треба да решава за тоа. Мислам дека во процесот на пристапување, ние сме сите демократски држави, историските спорови треба да се стават на страна. Јас би кажал дека историските разлики не смеат да бидат причина да се оспори капацитетот на земја-кандидат да продолжи на патот на пристапување кон ЕУ. Тоа е нашата позиција и сметам дека е и позиција на ЕУ“,
рече Левиц.
Тој одговорите ги даде на заедничка прес-конференција со шефот на државата Стево Пендаровски, кој пак, ѝ се заблагодари на Латвија што е една од земјите-членки што одамна ја препознале нашата подготвеност и пожртвуваност за членство во Унијата.
Двајцата претседатели на прес-конференцијата ја осудија и руската агресија врз Украина.