Претседателот на австрискиот Национален совет, Волфгранг Соботка, изрази надеж дека кон крајот на март Советот на ЕУ ќе даде зелено светло за почеток на преговорите со Северна Македонија бидејќи, како што рече, државата со своето однесување веќе претставува европска земја.
„Австрија отсекогаш ја поддржувала Северна Македонија на нејзиниот пат кон ЕУ и ќе продолжи да ја нуди таа силна и безрезервна поддршка во рамки на структурите на ЕУ. Северна Македоника изминатиот период направи значителен напредок, особено во носењето на важни закони, како Законот за јавно обвинителство“,
изјави Соботка кој денеска е во посета на земјава и утрово имаше заедничка прес-конференција со претседателот на Собранието, Талат Џафери.
Тој го истакна и договорот со Грција за решавање на спорот за името посочувајќи дека Северна Македонија придонесува за намалување на конфликтите во регионот.
Џафери, пак, порача дека земјата останува фокусирана на статегиската цел – полноправно членство во ЕУ, и потсети оти во последните денови на овој парламентарен состав беа донесени значајни законски решенија кои придонесоа во позитивен извештај од ЕК и обновена препорака за старт на преговорите.
„Се разбира дека ни е неопходна јасна европска перспектива, јасна временска рамка и методологија и во таа смисла многу е важно што новата методологија одговори на задоволителен начин на барањата на земјите – членки за поефикасен, подинамичен и покредибилен процес во проширување“,
истакна Талат Џафери.
Во рамки на својата посета, предвидено е претседателот на австрискиот Национален совет да има средби со лидерите на СДСМ и ВМРО-ДПМНЕ, Зоран Заев и Христијан Мицкоски, како и со претседателот на ДУИ, Али Ахмети.