Преселбата на административци во приватниот сектор ќе почне по изборите

Министерот за информатичко општество и администрација најави и други можни мерки за рационализација и систематизација на државниот и јавниот сектор

Откако ќе завршат изборите, ќе почне преселбата на административци во приватни фирми, најави денеска министерот за информатичко општество и администрација Дамјан Манчевски. Тој рече дека процесот на префрлање вработени од јавниот во приватниот сектор ќе „почека“ уште извесно време, затоа што во предизборниот период се забранети какви било разместувања во државните институции и претпријатија.

Министерот вели дека ќе се разгледаат предлозите на Конфедерацијата на слободни синдикати – парите што државата планира да им ги исплати на бизнисмените што ќе преземат административци да се дадат на Фондот за пензиско и инвалидско осигурување, како и да се донесе закон за предвремено пензионирање, со што би се намалил бројот на администрацијата.

„Пакетите ги дефиниравме и ги презентиравме во јавноста, така што веднаш по завршување на изборите ќе почне тој процес. Малку друга е интенцијата на новите предлози што не беа изнесени на досегашните состаноци. Ама, во секој случај, ќе ги разгледаме. Отворени сме за сите предлози“,

рече Манчевски.

Како што потенцираше, во предизборниот период не може да се спроведуваат ниту резултатите од законските анализи, како што е функционалната анализа за инспекторатите. Сè уште не е завршена функционалната анализа со којашто треба да се изврши  целосна реорганизација на институциите.

„За да се смени нешто во која било институција, односно да се спои, укине или воведе нова треба да се измени Законот за организација на органите во државната управа, кој се носи со двотретинско мнозинство. Потоа ќе се усогласуваат и поединечни закони“,

потсети Манчевски.

Тој пред еден месец имаше средба со претставниците на синдикатите  за петте модели на можна реорганизација на вработените во јавната администрација.

Едниот предлог е трансфер на вработените од јавниот во приватниот сектор, со тоа што приватната фирма би понудила повисока плата за вработените, а државата во одреден временски период би ги плаќала придонесите. Во опција се и пакети за преквалификација на вработените од јавниот во приватниот сектор, во согласност со потребите што ги доставиле претставниците на приватниот сектор, стопанските комори и Агенцијата за вработување. Има пакет и за испратнина по сопствена волја на вработени што сакаат да го напуштат јавниот сектор, како и предлог за преквалификација за внатрешни потреби и внатрешна реорганизација.