-Почитуван вицепремиер Маричиќ, прекрасно беше да се слуша македонскиот јазик, кажа министерката за европски прашања на Република Финска ,Тити Тупураинен, на почетокот на нејзиното излагање на заедничката прес-конференција во Владата, со вицепремиерот за европски прашања на Северна Македонија, Бојан Маричиќ и ирскиот министер за Европа, Томас Бирн.
Тупураинен посочи дека за неа е од посебно значење што се во официјална посета на земјава токму сега и посочи дека Финска и Ирска се едни од најсилните и најдоследните поддржувачи на Северна Макеоднија.
„Јас лично ги вложив сите мои лични напори во текот на претседателството во 2019 за да се започнат преговори за членство со Северна Македонија и Албанија и почетокот на преговорите останува наш највисок приоритет. Со задоволство гледам дека има позитивни чекори, ги поддржуваме сите напори да се најдат заемно прифатливи решенија. Почетокот на преговорите е од суштинска важност, не само за земјите кои се засегнати, туку и за Европската Унија. Се работи за кредибилитетот на ЕУ и нејзината политика на проширување, а се разбира ова е прашање на мир и стабилност на Западниот Балкан“,
кажа Тупураинен.
На новинарско прашање за стравот од асимилација кај дел од македонската јавност, дека ќе влезат во Европската Унија како Бугари, а не Македонци, Тупураинен порача дека во ЕУ не се случило никаква асимилација.
„Јас можам да ви кажам од нашето искуство, кога ние се приклучивме во 1995, тоа навистина ги смени нештата. Имаме јасен идентитет како Финци и сме дел од една голема заедница која споделува исти вредности во поглед на владеењето на правото и човековите права и додаде многу вредности, не само економски, ни дава повеќе предност во поглед на нашето глобално влијание и нашите соседски односи со Русија итн. Ние сме посилни во ЕУ, не се случило никаква асимилација, претопување на нашиот во европскиот идентитет. Постои европски индетитет што може да го препознаете на пример и во САД и јасно се познава дека сте европеец, меѓутоа, кога сте во Европа, вие длабоко во себе знаете кои сте и вие Македонците сте слободни да бидете кој што сакате и слободно може да го користите вашиот јазик додека сте членка“,
одговори Тупураинен и порача дека членството во ЕУ може само да го зајакне македонскиот јазик и идентитет.
*ПОВРЗАНА ВЕСТ: Маричиќ: Не би било одговорно да се одбие предлог во кој сме ги постигнале барањата