Вицепремиерот за европски прашања, Бојан Маричиќ, смета дека после осумнаесетгодишен маратон, Северна Македонија има историска можност за отпочнување на преговорите со Европската Унија, без дополнителни одложувања и со заштитен јазик и идентитет.
„Аргументираната реакција на премиерот Ковачевски на Самитот во Брисел, сега дава шанса за судбоносно ‘да’ за европската иднина за земјава, бидејќи со официјалниот француски предлог го добивме она за што се залагавме подолго време, а тоа е чиста формулација на македонскиот јазик, без никакви фусноти, ѕвездички, дообјаснувања, што за нас беше најважно во зачувување на нашите национални интереси. Тоа е она што се боревме, и што го посакувавме, тоа се нашите црвени линии кои успеавме да ги зачуваме“,
рече Маричиќ на денешната прес-конференција со министрите за Европа на Ирска и Финска.
Тој посочи дека во следните денови задачата е заеднички да се одлучи дали ќе ставиме крај на дводеценискиот лавиринт и ќе покажеме мудрост кон овој предлог кој е чувар на нашите интереси и нашите црвени линии или ќе влеземе во долгогодишен застој за кој смета дека секогаш по правило ни носи нови предизвици. Вицепремиерот посочи дека колку повеќе процесот се одолговлекува, толку ќе биде потежок за решавање.
„Без разлика на одлуката на Владата во врска со францускиот предлог, полноправното членство во Европската Унија останува наша стратешка цел. Сметам дека би било вистинска штета и за државата и за идните генерации овој момент да го пропуштиме сметајќи дека во иднина можеби ќе добиеме подобар предлог. Не би било одговорно да се одбие предлог во кој сме ги постигнале барањата, со надеж дека ќе ни се понуди друг. Напротив, секое одложување и губење време ни отвора можност за нови дневно-политички случувања. Не е момент за непотребно одложување, момент е за трезвена дискусија“,
кажа Маричиќ.