Од Асоцијацијата на спортски обложувачници на Македонија (АСОМ) велат дека предлогот за оддалечување на обложувачниците од училиштата се отфрла како целосно неприфатлив бидејќи растојанието од 500 метри ќе значи целосно затворање на сите објекти во кои се приредуваат игрите на среќа и гасење на една цела легална стопанска гранка
Оттаму додаваат дека ќе ги искористат сите механизми за спречат да се донесат предлог-измените на Законот. Од Здружението на вработени во секторот игри на среќа „Сакам да работам“, пак, додаваат дека доколку предлог-измените бидат усвоени тогаш ќе излезат на масовни протести со кои ќе бараат заштита на правата
Предлог-измените во Законот за игри на среќа, кои доаѓаат од Министерството за финансии (МФ), се неприфатливи за Асоцијацијата на спортски обложувачници на Македонија (АСОМ) и за Здружението на вработени во сектор игри на среќа „Сакам да работам“.
Промените во Законот што ги предложи МФ се однесуваат на лоцирање на обложувачниците на минимум 500 метри оддалеченост од образовни институции, како и подигнување на критериумите и условите за добивање лиценца и значително зголемување на давачките за приредувачите на игри на среќа и забавни игри.
Во тој контекст, од Асоцијацијата на спортски обложувачници на Македонија велат дека предлогот за оддалечување на деловните објекти од училиштата се отфрла како целосно неприфатлив бидејќи растојанието од 500 метри ќе значи целосно затворање на сите објекти во кои се приредуваат игрите на среќа и гасење на една цела легална стопанска гранка.
„Во многу наврати досега посочивме дека ваквиот предлог е практично невозможно да се спроведе на терен бидејќи дистанцирање од една образовна институција едноставно го доближува објектот до друга“,
посочуваат од АСОМ.
На истиот став е и Здружението на вработени во сектор игри на среќа „Сакам да работам“.
Оттаму посочуваат дека предлогот за дислокација на обложувачниците на минимум 500 метри од образовните институции е предлог за целосно затворање на објектите за игри на среќа и губење на работни места што би довело до, како што велат, драматични последици по целата економија во државата.
„После усвојувањето на едно вакво избрзано решение, ќе почне отворање ‘диви’ играчници, надвор од регулацијата на надлежните институции, каде што младите навистина ќе станат таргет. Аргумент за ова е аферата ‘Детонатор’, од 2011 година, кога полицијата заплени 1 500 на црно поставени покер апарати во нелегални играчници“,
се наведува во реакцијата на Здружението на вработени во сектор игри на среќа „Сакам да работам“.
„Кога многу домашни компании се прашуваат дали ќе треба да стават клуч и да ги отпуштат вработените, некој буквално си игра со судбината на една сериозна економска дејност која вработува 10 илјади луѓе, индиректно помага меѓу 54 до 100 илјади други работни места, секоја година придонесува со најмалку 280 милиони евра во државниот буџет“,
додаваат оттаму.
Од Асоцијацијата на спортски обложувачници воедно потсетуваат дека Северна Македонија е единствената земја во регионот која нема онлајн игри на среќа, со што, како што велат, индустрија дополнително трпи штети. Нашата стопанска дејност, додаваат оттаму, е дополнително оштетена од Владата бидејќи е исклучена од владините мерки за енергетската криза.
„Како стопанска дејност која нуди услуги не сме во можност преку зголемувањето на цената на услугата да ги покриеме дополнителните трошоци. И со сегашната цена на електричната енергија на светските берзи од каде стопанските субјекти во оваа дејност ја набавуваат, работењето е доведено до прагот на рентабилност. Дополнителните најави за понатамошно зголемување на електричната енергија на светските берзи ќе доведе до неможност за подмирување на обврските и сигурно гасење на целата стопанска дејност“,
велат од АСОМ.
Оттаму додаваат дека ќе ги искористат сите механизми за спречат предлог-измените на Законот да се донесе.
Од Здружението на вработени во секторот, пак, додаваат дека доколку предлог-измените бидат усвоени тогаш ќе излезат на масовни протести со кои ќе бараат заштита на правата.
Претходно денеска, Министерството за финансии (МФ) апелира Собранието што поскоро да ги усвои измените на Законот за приредување игри на среќа со кои ќе се овозможи обложувачниците да бидат на најмалку 500 метри оддалеченост од училиштата.
Измените и дополнувањата на Законот кој е подготвен од МФ е испратен до Собранието од јуни минатата година, а како што посочуваат од Министерството, тој е во собраниска процедура, во прво читање.