„Постигнуваме одредени заеднички ставови кои мислам дека ќе ги досредиме во иднина и ќе дојдеме до конечното решение за потпишување на новиот колективен договор“, вели министерката Јаневска
Преговорите за колективниот договор за вработените во основните и средните училишта привршуваат и се очекува за брзо време тој да биде потпишан, изјави министерката за образование и наука Весна Јаневска по денешната средба со претседателот на Синдикатот за образование, наука и култура (СОНК), Јаким Неделков.
За голем број од точките за кои се преговара, како што истакна министерката, веќе се усогласени ставовите, останува дополнително да се доусогласат и останатите точки, како што се покачувања за класно раководство, плаќање надоместок за пат на одредени наставници кои работат подалеку од училиштето, како и за некои други погодности кои ќе ги имаат членовите на СОНК.
„Денешниов состанок е еден од бројните кои ги одржувам со нашиот социјален партнер со цел подобрување на правата и можностите на вработените во основните и средните училишта. Низ тој континуиран процес со бројни разговори и преговори постигнуваме одредени заеднички ставови кои мислам дека ќе ги досредиме во иднина и ќе дојдеме до конечното решение за потпишување на новиот колективен договор“,
рече Јаневска.
Таа потврди и дека мартовската плата на вработените во основните и средните училишта, која ќе се исплати во април, ќе биде покачена за седум отсто како што беше претходно договорено. Претходно во текот на минатата година имаа зголемување од пет проценти.
„Ова е второ покачување на платата и е во согласност со инфлацијата. Сметаме дека тоа е важно зашто платата на наставниците реално ќе се покачува за да ги покриваат непредвидените трошоци. Со овој договор обезбедуваме и континуитет на покачување на платите на наставниците и другите вработени во основните и средните училишта кои ќе се одвиваат во следните четири години“,
додаде Јаневска.
И претседателот на СОНК потврди дека се во завршната фаза на преговори за колективниот договор за основното и за средното образование.
„Тоа се колективни договори кои не се обновени од 2008 година, што само по себе укажува дека се комплексни и дека се многу важни за нашите членови и за вработените во основното и средното образование. Токму затоа бараат многу сериозен пристап за носење на нивните финални решенија“,
рече Неделков.
Тој додаде дека како синдикат очекуваат со новиот колективен договор да имаат многу повеќе привилегии за членовите што не се опфатени со соодветен закон или некој друг колективен договор.
„Во новиот колективен договор се бараат зголемени права за нашите членови во однос на актуелни закони и колективни договори. Сè уште сме во фаза на завршни преговори, се работи најчесто за финансиски побарувања и права од финансиски карактер за кои сметам дека брзо ќе се договориме и ќе се потпишат колективните договори’,
рече Неделков.
Неделков рече и дека таргетот бил до денеска да се потпишат колективните договори, но, како што рече, заради обемноста на материјалните и заради немање закон за наставници и стручни соработници кои се битни за склучување на договорите ќе има мало доцнење.
„Тоа нема ништо да значи во негативна конотација за вработените во образованието и за нашите членови. Се работи за доцнење од две или три недели“,
рече Неделков.