Бидејќи велат дека има пари, еве нека дојдат да им покажам емпириски да видат како заборавиле 5 милијарди денари за пензионерите, возврати Мицкоски на тврдењата од опозицијата
Ребалансот на буџетот е на штета на домашните компании, Владата нема системски одговор на економските предизвици, порачува пратеникот на СДСМ и поранешен вицепремиер за економски прашања, Фатмир Битиќи. Во интервју за „Локално“ тој вели дека проекциите за буџетскиот дефицит и зголемувањето на јавниот долг се загрижувачки и покажуваат недостаток на одговорност.
„Се предвидува дефицит од фрапантни 4,9% и динамика на зголемување на јавниот долг на ниво од 68%. Ова се економски индикатори кои укажуваат на отсуство на намера и способност државата да се води кон стабилност и просперитет. Со овој раст на дефицитот и јавниот долг, успеваат да создадат множество на реални ризици кои ќе ја поништат и драматично намалат реалната куповна моќ на пензионерите со предвиденото линеарно покачување. Во оваа ситуација, покачувањето на пензиите станува празно ветување,“
потенцира Битиќи.
Според Битиќи, ако економијата навистина беше во „клиничка смрт“, како што вели власта, не би можело да се врши ребаланс на буџетот.
„За да се врши прераспределба на пари, мора да има средства во буџетот, бидејќи не може да се распределува од празно во празно. Самиот чин на ребаланс покажува дека сепак има пари во буџетот, а дали тие се доволно за да ги задоволат економските аспирации на оваа Влада или други интересни групи е друго прашање. Она што може да биде загрижувачки во економска смисла е тоа што во пристапот на новата Влада не може да се артикулира јасна визија и стратегија за развој. Наместо да се фокусираат на одржлив економски раст и подобрување на животниот стандард на граѓаните, се чини дека новата влада се насочува кон краткорочни и политички мотивирани мерки, кои имаат за цел, пред сѐ, задоволување на пропагандни политички мотиви и интереси“ ,
порача Битиќи.
На новинарско прашање, пак до премиерот Мицкоски за овие и слични обвинувања кои доаѓаат од опозицијата во изминатите денови дека ребалансот на буџетот е неразвоен, тој го повтори ставот дека има „дупка“ во буџетот и дека недостасуваат 5 милијарди денари за пензионерите и 3,7 милијарди денари за земјоделците.
„Оставија буџет без пет милијарди денари, редовни за пензионерите. Затоа што шверцерски исплатиле една пензија во фискалана година за претходната. Јануари за декември исплатиле. Тоа е реалноста. Пет милијарди заборавиле, не знам како. Бидејќи велат дека има пари, еве нека дојдат да им покажам и емпириски да видат како заборавиле 5 милијарди денари за пензионерите.Постоеше можност да нема за пензионерите пензии. Понатаму заборавиле 3,7 милијарди денари за земјоделците, не знам како, еве прашајте ги нив нека ви кажат. Ги нема, па моравме ние да ги наоѓаме. Сега милијарда и 700, па до година уште две милијарди итн“,
рече Мицкоски.
Обвинувањата меѓу власта и опозицијата во однос на буџетот се разгореа откако министерката за финансии Гордана Димитриеска-Кочоска обајви дека буџетот е оштетен за повеќе од 32 милијарди денари.
„Лошата состојба во буџетот ги надмина и нашите очекувања. Во овој краток период додека се подготвуваше ребалансот, отворив многу прашања, но добив и многу непријатни изненадувања. Ветив дека ќе бидам искрена пред граѓаните. Затекнуваме состојба која значи држава во хаос и долгови. Буџет кој е список на желби и предимензионрани плаќања, наместо креиран развој“,
кажа Кочоска-Димитриеска.
Од СДСМ возвратија дека не фали ниту денар во Буџетот, туку дека ВМРО-ДПМНЕ си бара алиби како да крати на платите за работиниците и за да го оправда заемот од Унгарија.
„Тука сакам да ја разобличам манипулацијата која секој ден ја повторуваат, дека немало пари во буџетот. Замислете, им се ветува на луѓето дека загарантираната плата која никогаш во последните седум години не била доведена до прашање, тие ќе ја обезбедат. Какво потценување и манипулирање. Им порачувам на работниците да не дозволат ваква манипулација. Единствена причина зошто ова го прават е тоа дека покачување на плати нема да има и да бидат среќни што воопшто земале плата. Ова е жално и потценувачки за работниците“,
порача Лукаревска.