На брифингот со новинарите претседателот на Собранието зборуваше и за најавениот референдум што го најавува ВМРО-ДПМНЕ во врска со преговарачката рамка за ЕУ, како и за уставните измени кои треба да се случат за вклучување на Бугарите во Уставот, но не сакаше да коментира многу бидејќи, според него, е преурането сега да ги коментира ваквите најави
Пратениците треба да си ја заработат платата и да бидат во салата, порача денеска на брифинг со новинарите претседателот на Собранието, Талат Џафери, зборувајќи за актуелните случувања во парламентот со немањето кворум и активната блокада на ВМРО-ДПМНЕ.
Проблемите во владејачката коалиција, пак, посочи Џафери, треба да се решаваат политички, а не со неприсуство и негласање на закони.
„Не е прашањето на еден субјект, туку еден па друг субјект. Ако односите во извршната власт имаат проблем поради политичките договори, треба таму да ги решаваат. Мене политички договори не ме интересираат. Овде сме дојдени за гласање на закони“,
рече Џафери.
Тој ги коментираше и отсуствата од седниците на неговиот партиски лидер, Али Ахмети, и на претседателот на ДПА, Мендух Тачи, за кои рече дека за гласање тие се најредовни во Собранието. Отсуството на Ахмети, според него, е поради партиски активности како лидер на партија.
На брифингот тој зборуваше и за најавениот референдум што го најавува ВМРО-ДПМНЕ во врска со преговарачката рамка за ЕУ, како и за уставните измени кои треба да се случат за вклучување на Бугарите во Уставот, но не сакаше да коментира многу бидејќи, според него, е преурането да ги коментира ваквите најави.
„Нема материјал за да се изјаснам. Опозицијата хипотетички прави ситуација“,
истакна претседателот на парламентот.
Собранискиот спикер на средбата со новинарите сподели и статистички податоци дека од почетокот на неговиот мандат на 4 август 2020 година одржани се 83 седници со 973 точки на дневен ред. Завршени се 54 седници, додека незавршени се 29 со 80 точки. Во прегледот тој ја презентираше и работата на комисиите, каде според него се заглавени повеќе закони и покрај тоа што биле исполнети условите и изминати роковите. Во тој контекст Џафери ги обвини опозициските пратеници, кои се претседатели на дел од комисиите, дека блокирале дел од законите.