Ова вечерва го соопшти координаторот на пратеничката група на опозициската партија Никола Мицевски
Претседателот на Алтернатива, Африм Гаши, денеска во изјава за „360 степени“ вели дека имаат начелен договор со својот коалициски партнер, лидерот на Алијанса за Албанците, Зијадин Села, да присуствуваат на утрешната седница на Собранието и ако нема кворум за 32. седница, нивните пратници ќе го обезбедат
Пратеничката група на ВМРО-ДПМНЕ ќе присуствува на утрешната 36. седница на чиј дневен ред се законите од петтиот пакет мерки, но не и на 32. седница, која е закажана пред 36. седница, изјави вечерва координаторот на пратеничката група Никола Мицевски во интервју за Сител.
„Пратеничката група на ВМРО-ДПМНЕ ќе биде во Собранието и ќе учествува во работата на 36. седница. Доколку немаат пратеници, сите 44 пратеници на ВМРО-ДПМНЕ ќе бидат во пленарната сала. Нема да бидеме внатре на 32. седница. Работа на претседателот на Собранието е да констатира има или нема кворум за 32. седница. Доколку има кворум, работи по 32.седница и завршува со неа. Доколку нема кворум, не ја ни почнува или констатира и ја презакажува за некој нареден период“,
рече Мицевски.
Собранискиот спикер го закажа продолжението на двете седници за утре, и тоа едната во 14 часот , а другата само 15 минути подоцна, на која на дневен ред се економските мерки за справување со последиците врз бизнисот предвизвикани од здравствената криза поради пандемијата.
Собраниската седница во четвртокот беше прекината во тензична атмосфера, кога Џафери и пратениците од ВМРО-ДПМНЕ со часови се убедуваа која седница да има предност. Џафери инсистираше да ги изгласаат законите од 32-та, па да преминат на следната, бидејќи повеќе закони со месеци се заглавени во собраниска процедура. Тој ги обвини пратениците кои се потпишале дека се присутни во Собранието и врз основа на тоа остваруваат права како патни трошоци, дека се должни да учествуваат во работата на Собранието, а не да чекаат пред врата и да бираат на која седница ќе присуствуваат.
Пратениците од ВМРО-ДПМНЕ, пак инсистираа прво да се изгласаат законите од петтиот сет економски мерки. Тие се сомневаа дека власта не сака да се донесат овие мерки,затоа што немало доволно пари во буџетот и одбиваа да прават кворум за другите закони на дневен ред.
Претседателот на Алтернатива, Африм Гаши, денеска во изјава за „360 степени“ вели дека имаат начелен договор со својот коалициски партнер, лидерот на Алијанса за Албанците, Зијадин Села, да присуствуваат на утрешната седница на Собранието.
„Ние рековме дека ќе ги поддржиме антикризните мерки, но се уште не ни е јасно зошто Талат Џафери упорно инсистира пред седница на која ќе се гласаат (36. седница н.з), да биде одржано продолжение на 32. седница. Навистина не можеме да го разбереме неговото однесување“,
вели Гаши за „360 степени“.
Тој, сепак, потенцира дека нема да им дозволат на ДУИ и на Талат Џафери да ги користат како алиби и ќе учествуваат во работата на парламентот и доколку навистина има потреба и нема кворум, тогаш вели дека нивните пратеници ќе влезат во собраниската сала и ќе го обезбедат.
Координаторот на пратеничката група на СДСМ Јован Митрески, во изјава за „360 степен“ се надеваат дека постигнатиот договор на нивниот лидер Заев со Села и со Гаши за Законот за државјанство ќе придонесе за нормализирање на работата на Собранието, но доколку тоа не се случи, тогаш навестуваат дека ќе бидат принудени, пратениците од мнозинството кои се болни од ковид да бидат донесени во салата и да учествуваат во работата со скафандери.
Тројца пратеници од власта се позитивни на ковид, а неофицијално, утре од изолација излегува еден од нив.