Вчерашното продолжение на седницата завршило дури ноќеска, односно во еден часот по полноќ, по десетчасовен говор на пратеничката од опозициската партија Бети Стаменковска-Трајковска. И денеска комисиската расправа продолжи во идентичен ритам, со долга процедурална забелешка на пратеничката од редовите на опозициската ВМРО-ДПМНЕ, Ели Панова, која побара стенограми од вчерашното маратонско продолжение на седницата и ја обвини претседателката на Комисијата дека ја прекинала седницата спротивно на деловникот
Според Панова, претседателката на Комисијата требало да обезбеди и вода за пратениците, но и лекар и вработени во службите. Таа побара и стенограми од говорот на претседателот на Собранието Талат Џафери од пред повеќе години, кога како пратеник долго читаше поезија и молчеше на седницата на собраниската Комисија за да се види, како што рече, дали нему му била дозволена пауза
Пратениците на ВМРО-ДПМНЕ со долги говори на седницата на Комисијата за прашања на избори и именувања и денеска ја продолжија расправата за предлогот Јавниот обвинител, Љубомир Јовески да биде избран за уставен судија.
Вчерашното продолжение на седницата завршило дури ноќеска, односно во еден часот по полноќ, по десетчасовен говор на пратеничката од опозициската партија, Бети Стаменковска-Трајковска. И денеска комисиската расправа продолжи во идентичен ритам, со долга процедурална забелешка на пратеничката од редовите на опозициската ВМРО-ДПМНЕ, Ели Панова, која побара стенограми од вчерашното маратонско продолжение на седницата, а прочита и деловник за работа на Комисијата.
Таа ја обвини претседателката на Комисијата, Марија Герогиевска дека не дела никаква пауза и ја прекинала седницата откако пратеничката Стаменовска-Трајковска за кратко ја напуштила салата.
Според Панова, претседателката на Комисијата требало да обезбеди и вода за пратениците, но и лекар и вработени во службите. Таа побара и стенограми од говорот на претседателот на Собранието, Талат Џафери од пред повеќе години, кога како пратеник долго читаше поезија и молчеше на седницата на собраниската Комисија за да се види, како што рече, дали нему му била дозволена пауза.
„Таа рече дека мора да излезе на две минути од салата и го остави вклучен микрофонот и вие ја завршивте седницата“,
рече Панова, обвинувајќи дека Георгиевска и го одзела правото на говор на Бети Стаменсковска Трајковска и побара таа да продолжи да зборува.
Пратеничката на ВМРО-ДПМНЕ, која најави дека опозициските пратеници ќе имаат долги говори, го повтори ставот на партијата зошто не го поддржуваат Јовески да стане уставен судија и најави дека тие колку што можат подолго демократски ќе го одолговлекуваат гласањето за него, за да спречат тој да стане уставен судија.
„Сметаме дека е одговорен за криминали и афери што тој не ги расчистил“,
рече Панова, додавајќи дека Јовески, но и Татјана Васиќ Бозаџиева, која исто така е предлог на владејачките партии, не смеат да бидат уставни судии.
Панова, која е и заменик-координаторка на пратеничката група на ВМРО-ДПМНЕ во Собранието исто така го прочита и Деловникот на Комисијата за прашања на изборите и именувањата од претходниот состав, за кој рече оти смета дека се уште важи и треба да се применува, а побара и да се води записник од седницата.
Таа забележа дека поголем дел од членовите на Комисијата, меѓу кои и потпретседателите на Собранието, со денови не дошле на седницата на која се расправа за предлозите на уставните судии. Георгиевска, според Панова, треба исто така да води евиденција на присутни пратеници и нивни заменици.
Претседателката на Комисијата Георгиевска рече дека за стенограмите од синоќа ќе ги извести службите и оти кога ќе бидат подготвени ќе бидат испратени до пратениците, додека за стенограмите од обраќањето на Џафери упати пратеничката група на опозициската партија да се обрати со барање до генералната секретарка, како и за барањето додека траат седниците да биде обезбедено присуство на лекар. Во однос на Деловникот, кажа дека за тоа што не е регулирано со последниот Деловник на Собранието, се применува стариот деловник на Комисијата. Доколку, некој има забелешки за водењето на седницата, рече дека пратениците имаат право да побараат мислење од Комисијата за мандатно – имунитетни прашања.
„За вчерашната седница, јас ќе повторам со целосна почит кон сите пратеници во ова Собрание, воопшто не смее да се дозволи да се наметне став дека јас сум бесчувствителна и дека не водам сметка за она што се случува во текот на работата на оваа Комисија. Како и вчера така и денеска ќе повторам, зборувате за филибастеринг, за исцрпувачки говори…Јас и вчера напоменав дека сте свесни дека ќе настапувате со таков начин на дискусии со што сакате да го покажете вашиот став околу работите и тоа го почитувам, меѓутоа тогаш бидете подготвени дека тие говори се исцрпувачки“,
рече Георгиевска.
По обраќањето на Георгиевска, имаше повеќе пријави за процедурални забелешки, но таа ја прекина седницата најавувајќи дека пратениците дополнително ќе бидат известени за продолжението на седницата.
Љубомир Јовески е последен кандидат од предложените кандидати за уставен судија за кој расправа Комисијата. Тој е предложен е од СДСМ покрај другите двајца кандидати, Татјана Васиќ-Бозаџиева, која работи во Министерството за правда како државен советник за граѓанско законодавство и на граѓанскиот судија во Апелациониот суд во Скопје, Фатмир Скендер, кои ја добија поддршката од Комисијата.
Од предложените шест кандидати за уставни судии на опозициската ВМРО-ДПМНЕ ниту еден не доби поддршка.
Собраниската Комисија за прашања на изборите и именувањата не даде поддршка за ниту еден од кандидатите предложени од ВМРО-ДПМНЕ.
Опозициската партија како кандидати за членови на Уставниот суд ги предложи универзитетскиот професор, Саво Климовски, потоа Тодор Витларов, вработен во Вишото јавно обвинителство во Штип, судијата во пензија Бранко Секуловски, Воислав Димовски, доскорашен јавен обвинител од Основното јавно обвинителство во Охрид и судијката од Управниот суд, Весна Јовановска и професорката Родна Живковска.
Уставниот суд повеќе од една година работи во нецелосен состав. Од предвидените девет члена, на четворица им е истечен мандатот.
Седницата за избор на уставни судии беше закажана уште лани во јули, кога требаше да се утврдат предлозит, но помина во тензична атмосфера по што беше прекината.
Откако неколку месеци не можеа да се утврдат предлози, Комисијата за прашања на изборите и именувањата во меѓувреме претрпе и измени во составот. Нејзиниот поранешен претседател, Костадин Костадинов, на локалните избори во октомври 2021 година стана градоначалник на Струмица и го напушти парламентот. Дојде и до прекројување на мнозинството откако по истите избори Беса одлучи да излезе од мнозинството и да премине во опозиција. Одреден период се водеше и полемика дали нејзиниот пратеник Фадил Зендели треба да биде член на оваа комисија. На 3 март годинава модифицираното мнозинство, кое беше на став дека пратеникот не треба да го зазема местото кое ѝ припаѓа на владејачката коалиција, успеа да го разреши Зендели. На пленарна седница на 16 март конечно се комплетираше составот на Комисијата кога Марија Георгиевска од СДСМ беше избрана за нова претседателка на местото на Костадинов, а нејзиниот сопартиец Дарко Каевски беше избран за нов член на местото на Зендели.
Предлозите за уставни судии конечно беа утврдени кон средината на мај, оваа година. Од предлозите, Комисијата ќе треба да утврди кандидати што ќе ги испрати на пленарна седница, каде што за избор ќе биде потребно мнозинство од 61 пратеник.