Измените и дополнувањата на Законот за работни односи, кои треба да овозможат задолжително пензионирање на 64 години и 15 години стаж, денеска треба да се најдат на дневен ред на собраниската Комисија за труд и социјална политика. Тие се предложени во дневниот ред и за пленарната седница на Собранието која треба да започне денеска.
Предлогот за задолжително пензионирање пред два дена беше поднесен од пратениците на СДСМ, а во него се предвидуваат и исклучоци.
Исклучоците ќе важат за секторите каде што има дефицит на кадар, односно здравството и високото образование. Кога координаторот на пратеничката група на СДСМ Јован Митрески ги презентираше предлог-измените, посочи дека за да се овозможи и преоден рок нема да одат во пензија ниту оние што наполниле 64 години, а до 31 август 2020 поднеле барање за продолжување на договорите за вработување.
Вчера на оваа тема зборуваше и министерката за труд и социјална политика Јагода Шахпаска, која посочи дека според анализите на ресорното министерство до крајот на годинава возрасната граница за пензионирање со 64 години ќе ја достигнат околу 6 000 лица. Но, како што појасни и таа, тоа не значи дека согласно предложените законски измени сите тие ќе одат во пензија, токму од причина што дел од нив веќе имаат побарано барање за продолжување на работниот однос.
Таа рече дека со овие измени се предвидува прекинување на договорите за работа со 64 години возраст и 15 години пензиски стаж, доколку во друг закон не е поинаку регулирано.
„Според нашите анализи, бројката на вработени како од јавен така и од реален сектор збирно, до крајот на 2020 година, околу 6 000 вработени ќе наполнат 64 години. Но, тоа не значи дека сите овие граѓани ќе одат во пензија. Дел од нив поднеле барање согласно актуелното законско решение до крајот на 31 август за продолжување на работниот век и после продолжување на наполнување 64 години, а кој се однесува на следната календарска 2021 година“,
рече вчера министерката.
*Поврзани вести: