До крајот на годинава возрасната граница за пензионирање на 64 години ќе ја достигнат околу 6 000 лица, покажуваат анализите на Министерството за труд и социјална политика. Но, тоа не значи дека во согласност со предложените законски измени сите тие ќе одат во пензија, бидејќи дел од нив веќе имаат побарано да им се продолжи работниот однос, вели министерката за труд и социјална политика Јагода Шахпаска.
„Бројката на вработени и од јавниот и од реалниот сектор, збирно, покажува дека до крајот на 2020 година околу 6 000 вработени ќе наполнат 64 години. Но, тоа не значи дека сите овие граѓани ќе одат во пензија. Дел од нив поднеле барање согласно актуелното законско решение до крајот на 31 август за продолжување на работниот век и после продолжување на наполнување 64 години, а кој се однесува на следната календарска 2021 година“,
објасни Шахпаска.
Пратеници на СДСМ во координација со Министерството за труд вчера поднесоа измени на Законот за работни односи со кои се предвидува прекинување на договорите за работа со 64 години возраст и 15 години пензиски стаж, доколку во друг закон не е поинаку регулирано.