Како што се наведува во образложението на сега веќе усвоениот предлог-закон на сторителите на кривичните дела пренесување заразна болест (член 205 од Кривичниот законик) и непостапување според здравствените прописи за време на пандемија (член 206 од КЗ) им се овозможува алтернативна мерка – условна осуда
Со 76 гласа „за“, еден „против“ и ниту еден „воздржан“ Собранието денеска во рамките на 106. пленарна седница го донесе предлог-законот за амнестија на граѓани кои беа санкционирани поради прекршување на протоколите што беа воведени со вонредната состојба за време на пандемијата со коронавирус, прогласена на 18 март 2020 година.
Предлагачи на Законот, кој беше донесен по скратена постапка, се група пратеници, односно, како што може да се види од собраниските материјали, на него како предлагачи се потпишани пратениците Арта Биљали-Зендели, Панчо Минов, Снежана Калеска Ванчева .
Според листата на гласање, објавена на официјалната интернет-страница на Собранието, од присутните пратеници кои гласале по предлог-Законот, единствена „против“ гласала пратеничката и претседателка на партијата Демократска обнова на Македонија (ДОМ), Маја Морачанин.
Како што се наведува во образложението на сега веќе усвоениот предлог-закон, на сторителите на кривичните дела пренесување заразна болест (член 205 од Кривичниот законик) и непостапување според здравствените прописи за време на пандемија (член 206 од КЗ) им се овозможува алтернативна мерка – условна осуда.
„Потребата од уредување на оваа состојба е наметната од големиот број на вакви предмети во Основниот кривичен суд Скопје. За да се надмине ова состојба за оваа категорија на осудени за кривичните дела од член 205 и член 206 од Кривичниот законик, парична казна, или заменета на парична казна со казна затвор согласно одредбите од овој закон, ќе се замени алтернативна мерка условна осуда“,
се наведува во образложението на Законот.
Поради прекршување на протоколите за време на вонредната состојба, на голем број граѓани им беа изречени парични казни.
Граѓаните осудени на парични казни до и над 1 000 евра, како и оние кои поради неможност да ја платат или не ја платиле во целост таа им била заменета со казна затвор, со донесениот Закон за амнестија, казните, и паричните и затворските, им се заменуваат со алтернативна мерка условна осуда доколку во наредните две, односно три годни не сторат друго кривично дело.
Од 1 јануари 2020 година до 30 јуни 2022 година, се наведува, во Основниот кривичен суд Скопје од страна на Основното јавно обвинителство Скопје поднесени се 967 казнени налози за член 206 од Кривичниот законик. По овие казнени налози судот донел пресуда со која се осудени 1 223 лица на парична казна од по 123 000 денари.
„Заради неплаќање на паричната казна, Основниот кривичен суд има донесено 280 заменски решенија, со кои спрема 280 лица паричната казна е заменета со казна затвор. По истите овие решенија издадени се 205 упатни акти за издржување на казна затвор“,
се наведува во образложението на предлог-законот.
Според усвоениот Закон, амнестија не е предвидена за правните лица, односно фирмите, и за одговорните лица во правните лица кои се санционирани поради непочитување на протоколите за време на пандемијата и кршење на двете одредби од Кривичниот законик.