На расправата по првиот предог Фатмир Скендер да биде избран за уставен судија, опозицијата најмногу критики упати кон претседателката на комисијата за избор и именувања, Марија Георгиевска која побара од спикерот Џафери гласањето на двајцата предложени уставни судии да биде ставено на пленарна седница. Пратениците од опозицијата посочија дека таа и Џафери многу скоро „ќе се соочат со кривична одговорност“
Откако речиси цели два дена пратениците не успеаја да го утврдат дневниот ред за 88. пленарна седница којашто требаше да започне вчера во 11 часот, доцна попладнево беше усвоен дневниот ред, чија прва точка беше изборот на нов министер за локална самоуправа.
Дебатата по првата точка од дневниот ред воопшто не започна зашто нејзиниот предлагач, премиерот Димитар Ковачевски не беше присутен на седницата поради неговото патување во Абу Даби.
„Имајќи предвид фактот што предлагачот за првата точка од протоколарни причини е надвор со службена белешка не може да се отвори дебата“,
рече претседателот на Собранието Талат Џафери.
Пратениците потоа ја започнаа расправата по втората точка од дневниот ред – предлог за избор на уставни судии.
На расправата по првиот предог Фатмир Скендер да биде избран за уставен судија, опозицијата најмногу критики упати кон претседателката на комисијата за избор и именувања, Марија Георгиевска која побара од спикерот Џафери гласањето на двајцата предложени уставни судии да биде ставено на пленарна седница.
Пратениците од опозицијата посочија дека таа и Џафери многу скоро „ќе се соочат со кривична одговорност“.
Пратениците од власта, пак, се бранеа дека немаат намера да дозволат уставна криза во земјава, што би настанала доколку во скоро време не се пополнат четирите празни места во Уставниот суд, ако се има предвид дека во декември ќе нема ниту просто мнозинство за одржување седници.
Пратеникот од владејачкото мнозинство Панчо Минов истакна дека народните избраници мора да изберат уставни судии и не смеат да дозволат Уставниот суд да не биде функционален.
„За јавноста морам да го кажам сознанието за надлежноста на Собранието. Неуставно е ако ние како Собрание не избереме уставни судии, ако се утврдени во собраниското тело. Ние имаме голема одговорност и обврска бидејќи само нас Уставот не одредил да избираме уставни судии“,
рече Минов.
За предлог-уставните судии Фатмир Скендер и Татјана Васиќ-Бозаџиева, кои доаѓаат како предлози на владејачкото мнозинство, опозициските пратеници оценија дека ќе бидат пристрасни и партиски зависни во наредните девет години.
На Комисијата за прашања на изборите и именувањата имаше девет предлози за уставни судии, три од владејачкото мнозинство и шест од опозицијата.