Транспарент со фотографии од пратениците од владејачкото мнозинство на кој пишува „Предавници на народот“ беше поставен на бината пред Собранието на дешениот протест против францускиот предлог. Демонстраните од деветтиот по ред протест со слични пораки како и претходните денови побараа власта да каже „не“ за предлогот бидејќи, како што велат, со него се врши бугаризација на државата.
„Се обидуваат Бугарите да ја читаат историјата како чиста бугарска историја, тоа е содржано во предлогот и доаѓа токму од договорот за добрососедство од 2017-та година. Дали тоа значи дека ние треба да го заборавиме нашиот идентитет, да ги избришеме нашите досегашни книги, учебници, филмови и да заборавиме на се ? Ни малку не е наивно тоа што се обидуваат како едно наивно прашање да го вметнат протнувањето и ставањето на Бугарите во Уставот на Република Македонија. Ако тоа го дозволиме, знаете ли што ќе направиме? Ќе дозволиме да ни се истакнуваат бугарски симболи слободно, да ни се зборува на Бугарски јазик овде. Ние имаме наша историја, идентитет и ние имаме нешто што нашите предци го оставиле и не смееме да дозволиме сето тоа да го изгубиме“,
порача адвокатката Ружица Николовска.
На денешниот протест се обрати и поранешниот амбасадор Зоран Дабиќ од дипломатскиот синдикат кој побара оставка од министерот за надворешни работи, со обвинувања дека францускиот предлог дипломатите воопшто не го виделе.
„Бујар ве лажеше дека високите дипломати го виделе францускиот предлог и го анализирале. Тоа не е точно. Не само предлогот, туку и Протоколот не е влезен на главната врата во МНР, ниту низ архивата со бројче како што заслужува. Мора да е влезен низ задна врата или од гаражата од каде што влегува министерот на работа. Дипломатите жестоко се заплашуваат, се казнуваат и се бркаат од работа се со цел да се замолкнат оние што размислуваат со сопствена глава и оние што не прифаќаат да му бидат обичен декор на министерот Османи и параван за покритие на неговите активности“,
изјави Дабиќ.
Организаторите на протестот порачаа дека денеска протестираат и за поддршка на Дабиќ, бидејќи, како што велат, тој бил суспендиран од МНР затоа што се спротивставил на францускиот предлог.
Пред МНР демонстрантите испишаа графити „Македонија не е на продажба“, а поминаа и покрај плоштадот Скендербег, каде овој пат, за разлика од минатата недела, немаше инциденти.
Протестниот марш почна од пред Владата, а демонстрантите најавија дека ќе продолжат да протестираат и наредните денови. Како и претходните денови, протестот беше поддржан од ВМРО-ДПМНЕ и Левица.