Шеесет годишниот пратеник А.С. се расправал со полициски службеници на граничниот премин „Долно Блаце“ бидејќи не сакал да чека ред во колоната. Тој на висок тон се обратил на службениците и им ркеол дека никаде не чекал ред, па нема ни тука.
Како што информира Министерство за внатршени работи, вчера на 27 февруари во 18:25 часот на граничниот премин „Долно Блаце“, А.С. од Скопје, кој се претставил како пратеник во Собранието на РСМ и кој бил со неговото семејство со патничко возило „фолксваген пасат“, со скопски регистарски ознаки, на висок тон се обратил на полициските службеници со образложение дека никаде не чекал ред и дека ни тука нема да чека.
„По целосно документирање на случајот, против А.С. ќе бидат изготвени поднесоци по член 4 од Законот за прекршоците против јавниот ред и мир, по Законот гранична контрола (избегнување гранична контрола) и по Законот за безбедност на сообраќајот на патиштата (престигнување колона)“,
велат од МВР.
Претходно, порталот „Форнтлајн“ објави дека станува збор за пратеникот од редовите на Алијанса за Албанците, Абдула Салиу, кој имал жестока препирка со пограничните службеници.
Како што пишува порталот, Салиу се качил на тротоарот со своето возило и ги претекнал останатите што чекале на ред, ја поминал кабината на пограничната служба и се довезол до просторот каде што се врши царина.
„Пограничниот службеник дотрчал до возилото на пратеникот Салиу, кога тој излегол од возилото и му се развикал, фрлајќи му ги документите. Со висок тон му кажал дека е пратеник во Собранието на РСМ и дека за него не важат стандардните процедури при премин на границата. Претходно, Салиу го испратил своето малолетно дете до кабината да ги даде документите и да ја пренесе пораката од татко му дека не можел да чека во ред. Службеникот ги одбил документите, бидејќи решил да го почитува и одржува редот меѓу патниците“,
наведува порталот.
Досега, во јавноста за овој случај, се немаат произнесено ниту од Алијанса за Албанците, ниту самиот Салиу.