„Јас би рекол дека вистинската работа за нашите безбедносни служби и другите партнери е да продолжат да се обидуваат да разберат што се случило. Соединетите Држави беа јасни, одговорните за нападот мора да одговараат. Тоа останува нашата позиција. Ќе продолжиме да настојуваме да разбереме што се случи, кој е одговорен и зошто“, рекол амбасадорот на САД во Приштина на денешната средба со новинарите
Американскиот амбасадор во Косово, Џефри Ховениер, денеска изјави дека прашањето за одговорноста за нападот на косовската полиција во Бањска не завршува со изјавата на поранешниот потпретседател на Српска листа, Милан Радоичиќ, дека тој го организирал нападот, пренесува регионалниот сервис на Радио Слободна Европа (РСЕ).
Ховениер ова го изјавил во разговор со новинарите во амбасадата на Соединетите Американски Држави (САД) во Приштина, посочувајќи дека Вашингтон и партнерите ќе продолжат со настојувањата да разберат што навистина се случило и кој е одговорен за настаните во Бањска на 24 септември.
„Јас би рекол дека вистинската работа за нашите безбедносни служби и другите партнери е да продолжат да се обидуваат да разберат што се случило. Соединетите Држави беа јасни, одговорните за нападот мора да одговараат. Тоа останува нашата позиција. Ќе продолжиме да настојуваме да разбереме што се случи, кој е одговорен и зошто“,
рекол амбасадорот.
Во нападот на косовската полиција на 24 септември кај селото Бањска, на северот на Косово, загина полицискиот наредник Африм Буњаку, а неколку други беа повредени. Во престрелката меѓу полицијата и вооружената група загинаа тројца напаѓачи, а во околината на Бањска беше пронајден голем арсенал оружје.
Владата на Косово ја обвинува Србија за овој инцидент, додека официјален Белград негира каква било вмешаност.
Пет дена по инцидентот, односно на 29 септември, Милан Радоичиќ, бизнисмен и политичар од северот на Косово и поранешен потпретседател на Српската листа, најголемата партија на косовските Срби, ја презеде целосната одговорност за организирање на нападот.
Тој вчера беше приведен и сослушан од надлежените власти во Белград, а денеска со одлука на Вишиот суд беше ослободен од притвор и му е изречена мерка забрана за напуштање на територијата на Србија.
Прашан дали САД имаат сознанија кои биле плановите на вооружената група во Бањска и дали официјален Белград на некој начин е вмешан во нападите на косовската полиција, американскиот амбасадор во Приштина рекол дека САД сè уште прибираат информации за овој случај.
„За ова е потребно време. Тоа е комплицирана ситуација и ќе биде потребно време да се разберат сите детали“,
рекол Ховениер.
Тој повторил дека САД веруваат дека нападот не бил спонтан и дека бил „координиран“ од група која користела „софистицирано“ воено оружје, од кое повеќето било од српско потекло, со цел да се дестабилизира северот на Косово.
Ховениер бил прашан и дали САД имаат сознанија за тврдењата дека од јануари до септември Радоичиќ набавувал оружје од Тузла, на што американскиот амбасадор одговорил дека ова прашање се смета за „тема од интерес“.
„Важно е што српските власти почнаа да го анализираат она што јас би го нарекол синџирот на чување на материјалот. Имаше материјали произведени во Србија кои некако завршија во опрема за воооружје во Бањска. Ова е нешто што треба да го разбереме и решиме. Не можам да ги докажам тврдењата дека тие работи дошле од овде или од таму, од Тузла, треба уште да работиме“,
кажал Ховениер на средбата со новинарите.
Според оценката на американскиот амбасадор, вистинска жртва на нападот на 24 септември било локалното српско население.
„Тие само сакаат да продолжат со животот и сакаат да живеат во безбедни и достоинствени услови. Да одат на работа, да се вратат дома, да ги праќаат своите деца на училиште. Сето ова беше многу страшно. Постојат одредени луѓе кои се виновни за злосторствата на 24 септември. Според мене, луѓето кои имаат најмногу крв на рацете се луѓето кои пукале со пиштоли или поставувале експлозивните направи, што го убиле господинот Буњаку“,
рекол Ховениер.