Веројатно веќе е пронајдено решение. Јас, како политичар, ќе го поддржам тоа што ќе одлучат пратениците, вели премиерот
Предлог-измените на Изборниот законик, кои предвидуваат дека независните листи мора да соберат потписи од два отсто од избирачите во една општина за да се кандидираат на локалните избори, ќе бидат тргнати од предложениот закон, најави премиерот Зоран Заев.
Прагот ќе изнесува или еден отсто или воопшто ќе го нема.
„Секако дека не се плашиме од независни листи. Вчера поминав цел дел во парламентот и ги слушнав пратениците буквално од сите пратенички групи, укажувањата од стручната јавност се прифатливи и верувам дека веќе е изнајдено решение. Изборниот законик ќе биде согласно укажувањата кои стигнаа и од експертската јавност, но и од помалубројните партии заради тоа што тие оценија дека не е коректно поголемите партии да го определуваат прагот за неопходен број собрани потписи за поднесување на независните листи. Видов дека има амбиент и ќе биде намален прагот од два отсто, веројатно на еден отсто или можеби и укинат. Како ќе одлучат пратениците, јас како политичар тоа ќе го поддржам“,
изјави Заев денеска.
Предлогот за праг од два отсто, покрај тоа што предизвика бурни реакции кај помалите партии и кај активистите кои најавија независни листи на претстојните локални избори, се коси и со препораките на ОБСЕ/ОДИХР и на Венецијанската комисија.
Од Делегацијата на ЕУ во Скопје во изјава за „360 степени“ испратија јасна порака дека Венецијанска зборува за максимум еден отсто потписи за независни листи, а пред два дека и од ОДИХР на ОБСЕ кажаа дека остануваат на препораката од 2017 година – прагот да биде максимум еден отсто.
Вчера се огласи и претседателот Стево Пендаровски кој кажа дека нема да го потпише законот доколу прагот од два отсто не биде променет.