Во гаснењето се вклучиле и граничната полиција, вработените во јавното комунално претпријатие и хотелот „Фламинго“. Од Општината велат дека е избегната катастрофа со тоа што е спасен граничниот премин, две бензински пумпи и два хотела што се наоѓаат во близина
По четиричасовната борба со пламените јазици кои го зафатија шумскиот појас крај македонско-грчката граница, пожарот е ставен под контрола, соопштија од Општина Гевгелија.
Поради отежнатите временски услови односно ветарот, пожарот е сè уште активен, но е локализиран.
„Од ТППЕ-Гевгелија информираат дека пожарот зафати огромна површина борова шума, а поради ветрот истиот се прошири до грчката територија, зафаќајќи ја и граничната караулата на АРМ, каде опожарено е едно полициско возило“,
велат од Општина Гевгелија.
Покрај гевгелиските пожарникари, во борбата со пламените јазици се вклучило и јавното општинско претпријатие „Комуналец“, граничната полиција и вработените во хотелот „Фламинго“.
Од грчка страна, пак, пожарот го гаснеле пожарникари од Поликастро.
За среќа, велат од Општината, избегната е поголема катастрофа и пожарот не ги зафати граничниот премин, хотелите „Фламинго“ и „Принцес“, но и двете бензински пумпи „Шимов“ и „Окта“.