Првичните индиции за пожарот во Штип се дека станува збор за чистење на двор или спој на лабави жици меѓу две бандери, вели Ангелов
Се утврдува што точно го предизвикало пожарот на тврдината Исар во Штип, а се истражува и пожарот и кај штипската Млекара, каде што има сомнеж дека е подметнат, изјави директорот на Дирекцијата за заштита и спасување, Стојанче Ангелов. Според него, првичните индиции за пожарот во Штип се дека станува збор за чистење на двор или спој на лабави жици меѓу две бандери.
„Се работи на прецизирање на причинителите, но како и да е, ја користам приликава да упатам апел до сите граѓани да бидат внимателни и никаде никогаш да во текот на летото да не палат оган на отворен простор. Палењето оган од било кој мотив, дали да се зачисти доврот, понатаму земјоделците да ги зачистат своите стрништа, сточарите да ги исчистат своите пасишта, некој да направи скара или друг мотив, може да предизивка пожар со катастрофлани последици, како што, на пример, е пожарот на Исарот. Иако не е нанесена голема штета, сепак го унакази овој карактеристичен рид којшто се наоѓа веднаш до градот“,
кажа Ангелов.
Ангелов упати и апел и до граѓаните – доколку забележат разлабавени жици помеѓу бандери или далноводи, тоа да го пријават во ЕВН или на бројот за итни случаи 112.
„Aпелирам до граѓаните коишто имаат викендици или стари куќи, или полунапуштени, во нашите преубави македонски села, коишто некои се од разбиен тип, да ги зачистат своите дворови и на тој начин многу ќе ни помогнат, бидејќи не знаеме кога и како ќе избие следниот пожар. При избивањето во места надвор од градовите, во близина на селата, постои голема можност огнот да дојде до овие полунапуштени села, коишто немаат жители или има по неколку возрасни лица“,
додаде Ангелов.
Ангелов посочи дека пожарот во општина Пробиштип е целосно изгаснат, а во неговото гаснење биле вклучени три „ертрактори“, како и противпожарни единици од неколку градови и од доброволните друштва од Кочани, Пробиштип и Виница.