Околу 69 отсто од гласачите на неговата владејачка партија Ликуд сметаат дека тој треба да преземе одговорност
Околу 80 отсто од Израелците веруваат дека премиерот Бенјамин Нетанјаху требало јавно да објави дека ја презема одговорноста за неуспехот да го спречи нападот на Хамас врз Израел на 7 октомври. Ова се резултатите од анкетата на јавното мислење за весникот „Маарив“, кои беа објавени денеска, пренесува „Ројтерс“.
Началникот на Генералштабот на израелската армија, директорот на военото разузнавање и директорот на разузнавањето Шин Бета признаа дека нивните служби не успеале да го спречат нападот во кој загинаа речиси 1 400 Израелци во најсмртоносниот ден во 75-годишната историја на Израел.
Нетанјаху оваа недела изјави дека има многу прашања за нападот на 7 октомври и дека „ќе истражи сè темелно“.
Дури и мнозинството од гласачите на неговата владејачка партија Ликуд, 69 отсто од нив, сметаат дека тој треба да преземе одговорност.
Според анкетата, премиерот Бенјамин Нетанјаху, кој е лидер на десничарската конзервативна партија Ликуд, е далеку зад поранешниот министер за одбрана Бени Ганц, шеф на опозициската центристичка партија, која ѝ се приклучи на владата на национално единство минатата недела.
Четириесет и осум отсто од анкетираните сметаат дека Ганц би бил подобар премиер, во споредба со 28 отсто за Нетанјаху.
Анкетата покажува и дека 65 отсто од Израелците ја поддржуваат очекуваната копнена операција на израелските војници во Газа.
Анкетата била спроведена на 18 и 19 октомври и во неа биле прашани 510 испитаници, кои се репрезентативен примерок од возрасната популација во Израел на возраст од 18 и повеќе години.