Жештините во северна и централна Индија, како и во делови од западот на земјата со несмален интензитет траат веќе две недели, при што максималните температури со денови се движат меѓу 45 и 46 Целзиусови степени, а во некои области се искачуваат и до 50 степени
Во изминатите три дена повеќе од 50 луѓе починале во Индија од топлотниот бран што зафатил повеќе делови од земјата, пренесуваат светските медиуми.
Според Би-би-си, во текот на викендов во северната држава Утар Прадеш 33 лица починале како последица на жештините, а официјален претставник за новинската агенција АНИ изјавил дека во државата Одиша од топлотен удар починале околу 20 лица.
Повеќето од овие смртни случаи биле пријавени на 1 јуни, кога во Индија се одржуваше последната фаза од гласањето за општите избори во земјата, кои треба да бидат објавени на 4 јуни, односно утре.
Инаку, во Индија општи избори се одржуваат на секои пет години, во месеците април и мај, во кои годинава се бележат екстремно високи температури, со чести, поинтензивни и подолги топлотни бранови.
Федералното министерство за здравство на земјата соопштило дека од 1 март до 30 мај имало најмалку 56 потврдени смртни случаи од топлотен удар. Инаку, во овој период биле пријавени вкупно 24 849 случаи на топлотен удар, но податоците на државно ниво покажуваат дека реалната бројка би можела да биде многу поголема.
Меѓу оние што починале во Утар Прадеш биле и неколку полицајци доброволци, претставници на избирачките места, чувари и санитарни работници.
Главниот изборен службеник на државата, Навдип Ринва, во изјава за медиумите рекол дека на семејствата на починатите членови на избирачкиот персонал ќе им биде даден паричен надомест од 1,5 милиони рупии (18 000 американски долари), пренесува Би-би-си. Ринва, исто така, информирал дека на еден човек кој стоел во редот за гласање се онесвестил поради жештината.
„Гласачот е пренесен во здравствена установа, каде по пристигнувањето е констатирана смрт“,
рекол тој.
Сомнителни смртни случаи поврзани со топлотниот бран во Индија се пријавени и во државите Бихар, Мадја Прадеш и Џарканд.
Индискиот национален центар за контрола на болести го нарекува топлотниот удар состојба опасна по живот со стапка на смртност од 40 до 64 проценти.
Жештините во северна и централна Индија, како и во делови од западот на земјата со несмален интензитет траат веќе две недели, при што максималните температури со денови се движат меѓу 45 и 46 Целзиусови степени, а во некои области се искачуваат и до 50 степени.
Од индискиот метеоролошки оддел рекле дека температурите најверојатно ќе се намалат во наредните денови поради почетокот на монсуните.
Неколку региони се соочуваат со голем недостиг на вода и струја поради зголемената потрошувачка на електрична енергија.