Белгиското федерално обвинителство денеска потврди дека осомничениот, чиј идентитет допрва треба да се потврди, е убиен
Вооружен маж осомничен за убиство на двајца шведски државјани во терористички напад во Брисел, почина откако беше застрелан од полицијата, со што се стави крај на потерата во текот на ноќта, пренесува Си-ен-ен.
Белгиското федерално обвинителство денеска потврди дека осомничениот, чиј идентитет допрва треба да се потврди, е убиен.
Државното обвинителство ги објави деталите за акцијата во која беше убиен терористот. Како што велат, тој мирно влегол во кафуле во Шаербек со својот калашников со кој вчера убил двајца Швеѓани. Полицијата по неколку часа успеала да го фати и со еден истрел во градите го неутрализирала.
„Има многу силни индиции дека тоа е извршителот на нападот“,
се вели во соопштението и се додава дека ќе следува анализа на отпечатоци од прсти кои дефинитивно треба да го потврдат идентитетот на убиениот.
Het Federaal Parket bevestigt dat de dader van de schietpartij van gisterenavond werd geïdentificeerd en is overleden.
— CrisisCenter Belgium (@CrisiscenterBE) October 17, 2023
Јавниот радиодифузен сервис РТБФ претходно објави дека осомничениот бил убиен за време на полициска операција во вторникот наутро во областа Кејџ ау Орс во бриселската општина Шаербек, североисточно од главниот град.
„Полицијата го застрела и уби 45-годишниот Тунижанец, Абдесалем ал Гуилани, кој беше осомничен за синоќешното убиство на двајца шведски фудбалски навивачи во Брисел“,
пренесува РТБФ.
Според телевизијата, извршителот на нападот, кој властите го оквалификуваа како „терористички“, бил прогласен за мртов набргу откако бил пренесен в болница.
Белгиската министерка за внатрешни работи Анелис Верлинден, претходно, соопшти дека мажот осомничен за синоќешното убиство на двајцата шведски државјани во Брисел е застрелан од полицијата и оти покрај неговото тело е пронајдено автоматското оружје со кое е извршен нападот.
Белгискиот премиер Александар де Кро изјави дека осомничениот е маж со туниско потекло кој илегално живеел во Белгија.
Во објавата на социјалната мрежа, белгискиот премиер додава дека како блиски партнери, Белгија и Шведска имаат заеднички заложби и борби против тероризмот.
Вооружениот напад вчера се случи непосредно пред фудбалскиот натпревар Белгија-Шведска.