И 24 април и 8 мај 2024 година се ден среда
Освен за датумите за избори, и Ковачевски и Мицкоски рекоа дека на лидерската средба имало широк консензус за спроведување на забелешките за Изборниот законик од ОБСЕ/ОДИХР
Лидерите на парламентарните партии на денешната тричасовна средба постигнаа договор за датумите за претседателските и парламентарните избори кои треба да се одржат идната година. Првиот круг од трката за шеф на државата ќе се одржи на 24 април, а вториот круг ќе биде заедно со парламентарните избори на 8 мај. И 24 април и 8 мај 2024 г. се ден среда.
„Она што го заклучивме на средбата е дека редовните избори ќе се одржат на 24 април и тоа прв круг претседателски избори и 8 мај за втор круг претседателски и парламентарни избори. Согласно законот, техничка влада, односно пржинска влада, ќе има од 28 јануари и законската обврска која јас како премиер ја имам ќе се исполни, и секако коалицискиот договор ќе си биде исполнет“,
рече по средбата премиерот Димитар Ковачевски, кој на прес-конференцијата беше придружуван од коалициските партнери.
Потврда дека датумот на изборите е договорен, по прес-конференцијата на Ковачевски, стигна и од лидерот на ВМРО-ДПМНЕ, Христијан Мицкоски.
Освен за датумите за избори, и Ковачевски и Мицкоски рекоа дека на лидерската средба имало широк консензус за прифаќање на забелешките за Изборниот законик од ОБСЕ/ОДИХР.
„Што се однесува до измените на Изборниот законик, препораките на ОБСЕ/ОДИХР се препораки во делот на законската рамка, постапката во делот на приговор и жалбена постапка за заштита на избирачкото право, набљудувањето на изборите, регистрацијата на гласачи, изборната кампања, финансирањето на кампања, медиумското претставување во изборниот процес. Измените кои ги разговаравме се веќе усогласени и имплементирани во предлог-законот. Овие чекори кои се преземаат со имплементирање на препораките, а се со вклученост на сите политички чинители, е одличен пример за добра координација и заедничка работа во насока на подобрување на изборниот процес и генерално на изборите во иднина“,
рече Ковачевски.
Тој најави дека овие измени, односно предлог-законот, ќе се достави до координаторите на пратеничките групи со цел да влезе во собраниска процедура и да се изгласа навремено.
И за Мицкоски нема дилеми за препораките на ОБСЕ/ОДИХР.
„Тоа значи дека Изборниот законик во периодот што следува ќе се менува, иако мора да напоменам дека не е испочитувано правилото шест месеци пред почеток на кампања за изборен процес бидејќи, имајќи предвид дека согласноста за третото прашање, а тоа е првиот круг од претседателските избори да се случи на 24 април 2024 година, а вториот круг претседателски избори да биде заедно со парламентарните на 8 мај, тоа подразбира дека кампањата би почнала на 4 април и ако тоа се сведе на денешната дата, тоа значи дека сепак не го испочитувавме правилото за кое честопати потсетував – тоа е да немаме интервенции во Изборниот законик шест месеци пред почеток на кампања“,
рече Мицкоски.
И двајцата лидери информираа дека не е постигнат договор за уставните измени.
„Прифаќањето на уставните измени останува единствениот предуслов за да продолжиме напред, тоа е јасно, и секое одлагање и ставање во неизвесност на преговорите и на нашето полноправно членство е исклучително неодговорна и опасна политичка одлука. Овој став го споделив на лидерскиот состанок, со напомена дека уставните измени ќе останат да бидат обврска и за овој парламентарен состав и за секој нареден и секоја теза дека има некоја друга алтернатива за нашето членство во ЕУ е погрешно. Сега е време да се постапи правилно и да се донесат уставните измени“,
додаде Ковачевски.
Мицкоски и од законодавниот дом, по лидерската средба, го повтори ставот на ВМРО-ДПМНЕ дека во овој момент услови за евентуални уставни измени нема.
Ковачевски, посочувајќи ги датумите за избори, рече дека согласно законот, техничка, односно пржинска влада, ќе има од 28 јануари и обврската која тој како премиер ја има (да поднесе оставка сто ден пред изборите, н.з.) ќе се исполни, а и, како што рече, коалицискиот договор ќе си биде исполнет.
На новинарските прашања дали имаат договорено кој ќе биде технички премиер, Ковачевски рече дека околу ова прашање не може да шпекулира со кое било име.
Мицкоски рече дека прашањето за техничка влада било отворено на средбата, но од тоа што можел да го слушне од присутните, како што рече, не постои консензус, особено од владините коалициски партнери, да биде избришана од овие избори.
Тој изрази загриженост затоа што се уште не е комплетиран составот на ДИК и апелира претседателот на Собранието, Талат Џафери, изборот на член во Комисијата да го стави на дневен ред.
А токму изборот на член на ДИК беше причина за денешната средба да ја напуштат лидерите на Демократско движење, Беса и на Алтернатива кои го обвинија собранискиот спикер дека се подготвуваа сценарио за фалсификување на изборите.
„Кога точка на дневен ред беше членот во ДИК каде што ние елабориравме, тој ја напушти седницата и затоа и ние излеговме зашто немаше со кого да ги соочиме аргументите“,
рече во изјава за медиумите лидерот на Демократско движење, Изет Меџити, кој заедно со лидерите на Беса и на Алтернатива е дел од „Европски сојуз за промени“.