Меџити, откако ја напуштија лидерската средба, рече дека нивните барања, кои ги елаборирал Билал Касами, а се во име на албанската опозиција, се да има предвремени парламентарни избори
Изет Меџити, Билал Касами и Африм Гаши од коалицијата „Европски сојуз за промени“ ја напуштија денешната лидерска средба со образложение дека до тоа дошло откако и собранискиот спикер Талат Џафери излегол од средбата кога точка на дневен ред била изборот на член во Државната изборна комисија.
Според лидерите на Демократското движење, Беса и Алтернатива, ако ова се случува на првиот чекор, тоа веќе, како што рекоа, ни кажува дека веќе подготвуваат сценарио за фалсификување на изборите.
„Кога точка на дневен ред беше членот во ДИК каде што ние елабориравме, тој ја напушти седницата и затоа и ние излеговме зошто немаше со кого да ги соочиме аргументите“,
рече лидерот на Демократското движење, Изет Меџити, кој заедно со лидерите на Беса и Алтернатива е дел од „Европскиот сојуз за промени“.
Меџити, откако ја напуштија лидерската средба, рече дека нивните барања, кои ги елаборирал Билал Касами, а се во име на албанската опозиција, се да има предвремени парламентарни избори.
Оваа влада, рече Меџити, потфрли во главното ветување – евроинтеграциите, како и во сите сфери.
„Наш предлог е датум за парламентарни и претседателски избори да бидат 14 и 28 април. На 28 да биде вториот круг од претседателските и парламентарните заедно, за да не влеземе во ситуација кога утре-задутре некој може да ги оспори изборите“,
додаде Меџити.
Во однос на техничката влада, Меџити рече дека нивниот став е дека овој пат треба да има, но сега министрите да бидат од албанската опозиција за еднаш засекогаш, како што рече, да се отстрани дел од режимот и да има услови за фер и демократски избори.
Според Меџити, во однос на членот на ДИК, Џафери ова го одолговлекува долго време. На прашањето дали Џафери дал образложение зошто ја напушта средбата, Меџити рече дека нема аргументи.
„Една година гледаме интенција да не се избере член и ДИК да не биде целосна, што утре-задутре може да биде причина некој да ги оспори и да се жали на изборите и така влегуваме во друг непознат простор. Моментно соодносот е четири спрема два. Позицијата има четири, а според законот опозицијата треба да има три члена. ВМРО-ДПМНЕ е присутна со двајца членови, третиот треба да биде наш, на албанската опозиција за да се исполнат законските услови“,
додаде тој.
Во однос на Алијанса за албанците, Меџити вели дека доволен е фактот што таму член беше Кренар Лога, кој моментно е министер за правда и тоа, според него, нема никаква логика тие да претендираат да претставуваат албанска опозиција.
„Ние уште еднаш ја користиме оваа можност да упатиме апел до Џафери да прекине со овие работи зашто ова ќе го оцениме како обид за фалсификат на наредните парламентарни избори и за нефер демократски избори. Она што друго го бараат од ’Европскиот сојуз за промени’ е на дијаспората да ѝ се овозможи да гласа преку пошта или електронски бидејќи цениме дека е значаен и нераскинлив дел од нашата држава“,
рече тој.
За изборот на член за Државната изборна комисија, пред да почне лидерската средба, ставот на Алијанса за Албанците го изнесе лидерот Арбен Таравари.
На новинарско прашање дали остануваат на позицијата нивни да биде членот на ДИК и дали добиле поддршка од СДСМ, Таравари рече дека за член на ДИК одлучува народот на избори.
„Кои партии добиваат најголем број на пратеници. Алијанса за Албанците имаше осум пратеници и имаше член во ДИК. Изет Меџити тогаш беше дел од ДУИ и ДУИ сега има член на ДИК. Билал Касами беше на иста листа со СДСМ и тие имаат член во ДИК. Африм Гаши беше со нас и нашиот претставник е претставник на Алтернатива во ДИК“,
рече Таравари.
Досега на лидерската средба, според информациите кои пред новинарите ги изнесе пратеникот и претседател на Демократскиот сојуз, Павле Трајанов, ставовите ги изнеле повеќето лидери, а по паузата се очекува да се произнесе и лидерот на ВМРО-ДПМНЕ, Христијан Мицкоски.
Трајанов рече дека се најавуваат некои заклучоци, но според досегашниот тек на расправата, според него, тешко дека ќе има консензус освен за датум за избори.
Според изјавата на Трајанов, 8 мај, датум кој од власта беше посочен како можен кога би се одржале парламентарните и вториот круг од претседателски избори бил предлогот што премиерот Димитар Ковачевски го кажал на лидерската средба.