Причина е привремената забрана за летови кон и од Кина
Испраќање поштенски пратки од нашата земја кон примачи на подрачје на Кина нема да се врши во наредниот период поради привремената забрана за летови кон и од Кина, која ја воведоа авиокомпаниите како резултат на ширењето на коронавирусот, информираат од државната пошта.
Пратките од Кина пак сè уште пристигнуваат и се доставуваат според вообичаената динамика.
„Поради ширењето на коронавирусот во Народна Република Кина, авиокомпаниите кои покрај превозот на патници вршат и транспорт на поштенски пратки за Кина, имаат воспоставено привремена забрана за летовите кон и од Кина. Поради тоа, испраќање на поштенски пратки од нашата земја кон примачи на подрачје на Кина нема да се врши во наредниот период“,
објави поштата на својата веб-страница.
Претходно, и дел од националните поштенски оператори во регионот, информираа дека престануваат да испорачуваат пратки од Кина, поради прекинатите летови од страна на авиокомпаниите.
Светската здравствена организација на почетокот на месецов соопшти дека примачите на пратки и писма од Кина не се изложени на ризик од зараза од коронавирус бидејќи, според последните анализи, вирусот не живее долго на површината на предметите, како што се писма или пакети.