На осмиот ден од протестите против францускиот предлог говорниците од пред Собранието повторно повикаа на обединување на народот затоа што Македонија се сака и се брани со акција и дела
„Да им кажеме едно големо НЕ за Ултиматум со кој што треба сами да се укинеме како нација и да го поништиме постоењето на нашиот мајчин јазик и да го загубиме идентитетот под налетот на големо бугарските фашистички закани и уцени“,
истакна Филип Ѓорѓиев на денешниот протест „Ултиматум, НЕ благодарам“.
Ѓорѓиев додаде дека треба Владата да го слушне народот кој е против Ултиматум. Ако треба македонскиот глас нека се слушне и до Софија, но македонскиот народ нема да дозволи да се асимилираат македонските граѓани.
„Европска Унија ДА, но само ако влеземе како Македонци кои ќе се гордо исправени, а не како асимилирани Бугари или било што друго, не со свиткани кичми, обезличени, обележани како нација со цртички или граѓани на некоја туѓа држава. А, ние младите ќе им порачаме и на домашните предавници, злонамерници и трговци на нашите човекови права и слободи кои лесно виткаат кичма дека Македонија е на Македонците и на сите народи во неа кои ја сакаат и ја чувствуваат како своја земја“,
потенцираше Ѓорѓиев.
Ѓорѓиев ги повика сите млади кои се уште се колебаат да го искажат својот револт, да се придружат на протестите затоа што Македонија се брани со акција и со дела, додавајќи дека младите имаат доволно причини да излезат што помасовно по улиците.
И водителот Димитар Атанасовски во своето обраќање на протестот против францускиот предлог пред Собранието повика што повеќе народ да излезе на протесите што и понатаму ќе траат секој ден во 19 часот.
„НЕ за разнебитување на Македонија, НЕ за заборав на македонскиот народ, НЕ за македонскиот јазик да биде некаков си дијалект затоа што сме посебни од памти век па до ден денеска говориме на македонски јазик и така ќе остане“,
изјави Атанасовски на денешниот протест.
Атанасовски повика на обединување, на национално обединување на сите граѓани на Република Македонија. Но, не само на граѓаните кои живеат овде, туку и на сите Македонци во целиот свет кои ги засега оваа тематика. Освен Македонците ги повикувам и Албанците, Турците, Бошњаците, Србите, Власите, Ромите и сите кои им значи Македонија.
„Повикувам да излеземе во што поголем број и да кажеме не, не заради тоа што сега или никогаш е дојдена работата. Не смееме да поминеме преку ова, не смееме да дозволиме историјата да не пишува како хибридна нација затоа што не сме такви, затоа што Македонци сме се родиле и Македонци се и нашите деца и сите идни поколенија“,
рече Атанасовски.
Атанасовски ги повика сите граѓани кои не можат да дојдат во Скопје да го изразат својот револт да се соберат во секој град и во секое село што помасовно за да се каже дека ова е важно за цела Македонија.
Демонстрантите придружувани од полициски кордон тргнаа од Владата, по што се упатија до Министерството за правда и завршија пред македонското Собрание. Учесниците на маршот пред парламентот ја испеаја македонската химна.