Варадкар работеше како лекар седум години пред да ја напушти професијата и да влезе во политика, по што во 2013 година беше избришан од медицинскиот регистар
Ирскиот премиер Лео Варадкар, кој е лекар по професија, повторно се пријавил за медицинска пракса и ќе работи една смена неделно за време на епидемија на коронавирус, соопшти денеска портпаролот на владиниот кабинет.
Варадкар работеше како лекар седум години пред да ја напушти професијата и да влезе во политика, по што во 2013 година беше избришан од медицинскиот регистар.
Во март министерот за здравство Симон Харис ги повика медицинските лица да се пријават и да му помогнат на здравствениот систем на земјата во борбата против коронавирусот, со порака: „Потребни сте ѝ вашата земја“. Илјадници медицински лица се пријавиле за да помогнат.
Според „Ајриш тајмс“, Варадкар повторно се пријавил во март кога почна кризата и ќе работи во Јавната здравствена служба (ХСЕ), каде што телефонски ќе контактира со луѓе кои мислат дека се заразени и ќе изнесува проценка за нивната состојба.
Ирскиот премиер потекнува од лекарско семејство. Татко му бил лекар, мајка му медицинска сестра, а уште неколку членови од неговото семејство работат во здравство.