На обвинетиот во „Рекет“, Бојан Јовановски-Боки 13, му е дијагностициран рак на желудникот и поради тоа тој и неговиот адвокат Сашко Дуковски ќе бараат да се преиспита одлуката за определување мерката притвор.
По денешното рочиште, адвокатот Дуковски излезе пред новинарите со документ – дијагноза издадена пред два дена од Градската болница „8 Септември“.
„Обвинетиот не е во состојбата да го следи судењето, не бараме ние одлагање, сакаме да ја утврдиме вистинската фактичка состојба, но со човек кој е во состојба да го следи судењето. Со човек кој постојано повраќа крв и не е во состојбата да следи судење, не може да се одвива еден фер предмет. Од тие причини денеска веднаш ќе биде поднесено барање за преиспитување на постоењето на околностите за понатамошно задржување во притвор. Ако ова документација издадена од супспецијалист не ја докажува неговата здравствена состојба, покрај повеќето од 20 извештаи претходно, не знам што друго да се направи. Понатамошното следење на предметот во таква состојба ќе претставува тортура и ние тоа нема да го дозволиме“,
изјави Дуковски.
Наодите од новите испитувања, со кои му е дијагностициран рак, во судницата претходно ги сподели и самиот Јовановски. Пред да почне судењето, кога обвинителката Вилма Русковска влезе во судницата, тој ѝ се обрати на висок тон.
„Што ме гледаш, корумпирана обвинителке, вршиш тортура врз мене“ и „Господ ќе ти врати“, беа дел од навредите што тој ги упати кон Русковска.
Инаку, на денешното рочиште се гледаа снимките од безбедносните камери од домот на Камчев, се прикажуваа фискални сметки од шопинг на Боки и мајка му во Милано вреден 148 000 евра, неколку дена по земањето на торбата „луј витон“ откај бизнисменот, за која се тврди дека била полна со еден милион евра, а се читаа и пораки од комуникација на Боки преку апликацијата „Ватсап“ со Катица Јанева, Фросина Ременски и Дејан Пелистерка.
*Поврзани вести:
Боки вербално ја нападна Русковска: Корумпирана обвинителке, вршите тортура врз мене!
Какви пораки разменувал Боки со Ременски, Камчев и Дејан Пелистерка