Здравствените власти во земјава се надеваат дека рестриктивните мерки што се во сила од вчера ќе дадат резултат. Полицискиот час што е воведен од 22 часот навечер до 5 часот наутро се очекува да ги спречи собирањата на младите кои по затворањето на кафулињата и кафеаните продолжувале со дружби.
Според министерот Венко Филипче, тие се сериозен вектор на пренос на вирусот.
„Сметаме дека младите како една група граѓани кои беа активни и многу често комуницираа и по затворањето на угостителските објекти, беа сериозен вектор на трансмисија на вирусот и поради тоа сметам дека во следните 10-ина дена ќе има промена на сликата. Сега бројката е нешто под илјада, следиме дали ќе има зголемување, но верувам дека овие мерки ќе дадат резултат“,
вели Филипче.
На прашањето дали високата бројка на заразени ја загрозува состојбата во болниците, Филипче вели дека состојбата е под контрола, дека има слободни кревети во секоја болница и има план доколку се пополнат капацитетите.
Во Скопје во функција се ставени интерните клиники, а има и план доколку се исполнат капацитетите што се на располагање. Во опција е просторот во стара „Систина“, но засега нема потреба бидејќи модуларните болници се сериозен капацитет од 10 000 квадратни метри и со 600 кревети.