Полицијата утрово околу 7 часот затворила уште еден угостителски објект во Дебар кој бил отворен и не ја почитувал забраната за работа која е на сила по воведувањето на кризна состојба во оваа и во Општина Центар Жупа.
Газдата на објектот е 61-годишен гостиварец, кој живее во Дебар.
„Во објектот е затекнат сопственикот Р.Ф.(61) од Гостивар, кој живее во Дебар и група граѓани. Сопственикот е приведен и против него ќе биде поднесена кривична пријава“,
информираа од МВР.
Пред два дена, и два други локала беа фатени како ја прекршуваат забраната за работа.
Инаку, изминатото деноноќие, според полицијата, било стабилно односно немало собирање на граѓани на јавни места, не е регистрирани наружување на јавниот ред и мир, кражби или сообраќајки.
„Мерките за контрола на патнички и други моторни возила за влез во Дебар и Центар Жупа, како и активностите за дотурот на стока се одвиваат тековно и без проблеми“,
посочуваат од МВР.
Оттаму потсетуваат дека сите фирми кои вршат достава на стока треба да се најават во Кризниот штаб на фиксниот телефонски број 046/831 051.