Полицијата на Хаити уапси 17 лица за убиството на претседателот Жовенел Моиз. Од нив, како што соопшти шефот на полицијата Леон Чарлс, 15 се поранешни колумбиски војници, а двајца се Американци, додека по уште осум лица се трага.
За случувањата се огласија и од Колумбија и од САД. Колумбиските власти објавија дека Хаити барал информации за шестмина осомничени од кои двајца се убиени во престрелка, и оти сите се пензионирани војници. Стејт департментот, пак, објави дека е запознаен оти се притворени двајца Американци, но дека нема да коментира.
Претседателот на Хаити беше убиен пред три дена во неговиот дом, а беше ранета и неговата сопруга.
Според информациите кои ги објавија властите на Хаити, атентаторите биле професионални платеници. Како што изјави хаитскиот амбасадор во САД, тие се претставиле како американци агенти односно припадници на ДЕА, но тоа било лажно со оглед дека нивото однесување не одговарало на тоа тврдење.