Од собраниската прес-служба информираат дека увидот од страна на МВР е завршен и сега се врши проценка од страна на собраниска комисија, осигурителна компанија и Бирото за судски вештачења, по што ќе се знае висината на направената штета
Припадници на Министерството за внатрешни работи синоќа извршиле увид на направената штета по вчерашниот инцидент што го предизвикаа пратениците на Левица за време на амандманската расправа во Собранието.
Претседателот на Собранието Талат Џафери вели дека постапката натаму треба да ја води Обвинителството или по пријава од полицијата или по допрен глас од она што се гледа дека се случувало на седницата од која има директен пренос како на Собранискиот канал така и преку веб-страницата на парламентот.
Од собраниската прес-служба информираат дека увидот од страна на МВР е завршен и сега се врши проценка од страна на собраниска комисија, осигурителна компанија и Бирото за судски вештачења. По ова, додаваа од собраниската прес-служба, ќе се знае висината на направената штета.
За направената штета, собранискиот спикер Џафери вели дека таа ќе треба да биде надоместена од пратеникот Борислав Крмов од Левица, кој го искрши мониторот и друг инвентар на претседавачката маса во пленарната сала.
„Ако некој од вработените направи штета на работа, тој го плаќа трошокот“,
вели Џафери во изјава за МИА и додава дека така ќе биде и во овој случај.
Поради неможноста пленарните седници да се одржуваат во салата за седници од денеска до санирање на штетата тие ќе се одржуваат во големата сала со купола, вклучувајќи го и обраќањето на генералниот секретар на НАТО, Јенс Столтенберг.
Пратеникот на Левица, Борислав Крмов, предизвикаа инцидент за време на амандманската расправа за новиот Деловник за работа на Собранието. Крмов, барајќи од потпретседателот Горан Мисовски седницата да биде прекината, искрши дел од инвентарот, вклучувајќи и монитор од претседавачката маса и расфрлаше листови од амандманите, а потоа нему му се придружи и Димитар Апасиев.