Амбасадорите на земјите членки на ЕУ во петокот не успеаја да го надминат ќор-сокакот и не ја убедија Бугарија да отстапи. Тоа предизвика зголемување на фрустрациите меѓу европските дипломати, кои велат дека Софија ја задржува мошне важната агенда на ЕУ за проширување со целосно внатрешен проблем, кој треба да биде решен на билатерално ниво со С Македонија, пишува денеска „Политико“.
Во написот на „Политико“ се наведува дека доколку Бугарија, изолирана како што е досега, продолжи со својот бескомпромисен став, ќе ја загуби добрата волја што ја ужива меѓу земјите членки.
Медиумот се повикува на дипломат кој изјавил дека бугарските насилни тактики може да функционираат во решавањето на проблемите во подземјето на Софија, но се чини дека се крајно несоодветни на ниво на ЕУ.
Во текстот се потсетува дека бугарското МНР излезе со став дека сегашното решение не нуди легални гаранции, какви што бара Бугарија, во однос на несогласувањата со С Македонија. Бугарија ја информирала ЕК дека не може да ја прифати понудената преговарачка рамка за отворање на преговорите со Северна Македонија, став, кој во петокот го изнесе министерката за надворешни работи на Бугарија, Екатерина Захариева.
Тоа ја нарушува целта на германското претседателство со ЕУ за продолжување на процесот на проширување оваа година, наведува „Политико“ и додава дека Бугарија и С Македонија имаат спор за историјата и јазикот, при што Софија бара од Скопје да признае дека македонската нација и македонскиот јазик имаат бугарски корени, како и да се откаже од тврдењата дека има македонско малцинство во Бугарија.