Габриела Илиевска и Иван Чулаковски, советници во општина Битола од Независната граѓанска иницијатива „Поинаку“, ќе побараат општинскиот совет да испрати барање до Владата за субвенција на струјата на битолчани и да ја замрзне цената на струјата.
„Битола како најголема жртва во Македонија од производството на електрична енергија не смее и нема да има поскапа цена за електрична енергија. Напротив, Битола мора да има субвенционирана струја поради последиците кои ги трпи од РЕК – Битола. Поради превенција од коронавирусот, мислиме дека не е време да повикуваме на протести и масовни собирања и затоа уште еднаш ќе побараме по институционален пат.
1.Советот да донесе заклучок со кој бара од Владата на Република Македонија на првата следна седница да донесе одлука за субвенционирана струја за граѓаните на Општина Битола.
2.Советот да донесе заклучок со кој бара Владата на Република Македонија да донесе одлука со која се замрзнува цената на електричната енергија и останува иста како на ден 30.07.2020г. заради настанатата состојба со пандемијата со ковид-19 и економската криза во која се наоѓаат граѓаните“,
велат од Поинаку.
*поврзана вест: РЕК ја „посипува“ со опасен пепел Пелагонија
*поврзана вест: Двојни стандарди – за приватните фабрики-загадувачи клуч на врата, за државните одложување на рокови
Регулаторната комисија за енергетика ја зголеми цената на електричната енергија што ја плаќаат домаќинствата на регулираниот пазар за 7,42 отсто, а граѓаните и понатаму ќе можат да ја користат евтината тарифа во истите период како и досега. Зголемување на цените предизвика жестоки реакции во јавноста. Опозициската ВМРО-ДПМНЕ ја обвини власта дека е виновна за зголемување, додека СДСМ, вели дека за тоа одлучува единствено Регулаторната комисија.