Алијансата и независниот пратеник Панчо Минов бараат промена на членот 110, кој се покажа како најспорен, затоа што предвидува „бомбите“ во иднина да не бидат основа за подигање обвиненија
Два амандмана се поднесени на предлог-законот за ЈО пред почетокот на денешната седница на Комисијата за европски прашања. Едниот е од пратеникот Сурија Рушити од Алијансата за Албанците и се однесува на членот 110 од новото законско решение, додека другиот е од независниот пратеник Панчо Минов и со него исто така се интервенира во членот 110, кој се однесува на третманот на „бомбите“ при покренување обвиненија.
Поради овој член, кој предвидува „бомбите“ да не бидат основа за подигање обвиненија во иднина, од Алијансата најавија вчера дека нема да гласаат за новиот закон за ЈО.
Со тоа останува до крај неизвесно кои сè пратеници ќе учествуваат во обезбедување на 80 гласа за донесување на законот за ЈО. Извесно е дека амандманот на Рушиди нема да биде прифатен, меѓу другото, и затоа што така на пленарна седница би требало да биде доставен дополнет текст на законот, со што би се отворил простор за евентуална амандманска блокада на законот на пленарната седница.
Опозициската ВМРО-ДПМНЕ, иако не се согласува со последното законско решение за ЈО, реши да не доставува амандмани. Пратеникот Илија Димовски, на почетокот на комисиската седница, побара законот за ЈО да се симне од дневен ред, посочувајќи дека е направено тешко прекршување на процедурите со тоа што синоќа беше доставен нов текст на законот, кој не поминал на владина седница. Предлогот на Димовски не беше прифатен, а министерката за правда Рената Тренеска-Дескоска рече дека станува збор за грешка, односно дека првично во парламентот била пуштена верзија на законот која не била донесена на владина седница. Поради тоа, таа верзија била повлечена и во Собранието бил доставен предлогот кој помина на седницата на Владата во недела вечер.
Седницата на комисијата е прекината поради церемонијата за ратификување на Северноатлантскиот договор и ќе продолжи утре.
Утре, пак, би можела да продолжи и пленарната седница и за двете законски решенија. За законот за Совет на обвинители не е потребно двотретинско мнозинство, ама измените во него се поврзани со новите решенија во законот за ЈО.