Аналитичарот Небојша Крстиќ, кој важи за силен поддржувач на српскиот претседател Александар Вучиќ, денеска предложи за време на вонредната состојба во Србија да бидат исклучени социјалните мрежи Твитер, Фејсбук и Јутјуб.
Така, според него би се намалила епидемијата на ширење паника и би спречиле потенцијално смртоносните ефекти на коронавирусот.
Во својата редовна колумна за весникот Блиц, тој вели дека по прогласувањето вонредна состојба, треба да се размислува за опасностите кои потенцијално се поголеми од самиот вирус, а тоа е пред се паниката.
„На интернет постои добро органирана група т.н. опинион мејкери кои истураат отров, лажни вести и дезинформации 24/7. Ако мора да се врши дезинфекција на инфицираниот простор, неопходно е да се изврши дератизација на јавниот простор од сите кои свесно, намерно и организирано манипулираат со граѓаните и го дестабилизираат системот на здравствена заштита“,
смета Крстиќ.
Според него, ако во операцијата Сабја, која беше спроведена по атентатот врз Зоран Ѓинѓиќ биле уапсени 11 илјади луѓе, сега би било доволно да се стават зад решетки десет пати помалку, во операција која би се викала „дезинфекција и дератизација“.
„Иако и самиот сум љубител на социјалните мрежи, предлагам Твитер, Фејсбук и Јутјуб веднаш да се исклучат на територијата на Србија. Тоа треба да трае се додека е во важност вонредната состојба. Тоа е единствениот делотворен начин да се сузбие пандемијата на паника и да се спречат нејзините потенцијално смртоносни ефекти“,
пишува Крстиќ во колумна за денешносто издание на весникот Блиц.
Причина за ваквиот став на Крстиќ е сериозната критика која многу јавни личности ја упатуваат кон српската влада и особено кон претседателот Вучиќ кој пред две недели на официјална прес-конференција се потсмеваше на сериозноста на коронавирусот.
Дури, во негово присуство, лекари им препорачуваа на жените слободно да патуваат за Милано, каде ќе имало големи осмомартовски попусти.
Ставот на Вучиќ доживеа радикална трансформација и тој во неделата прогласи вонредна состојба, обвинувајќи ги за неодговорност сите кои патувале во Италија и го пренесле вирусот во Србија.
Небојша Крстиќ му беше советник за односи со јавноста на поранешниот претседател на Србија, Борис Тадиќ. Сега е еден од најгласните медиумски поддржувачи на политиката на Александар Вучиќ. Крстиќ е поранешен член на популарната белградска група „Идоли“