Најавувајќи го собирот, епископот Јаков Стобиски, кој деновиве се најде во фокусот на јавноста со неговите изјави за трансродовите лица и ЛГБТИ-популацијата, на прес-конференција изјави дека протестот не е насочен против припадниците на ЛГБТИ-заедницата, туку исклучиво против содржината на двата закона чие усвојување, како што вели, сериозно би ги загрозило правата на 99 отсто од населението во земјава
Под мотото „Имаме должност“, Македонската православна црква-Охридска архиепископија (МПЦ-ОА) денеска излегува на најавениот сенароден собир во знак на протест против предлог-законите за родова еднаквост и за матична евиденција за кои вели дека се сериозна закана за општеството.
Собирот ќе почне во 18 часот пред Соборниот храм „Св. Климент Охридски“ во Скопје.
Најавувајќи го собирот, епископот Јаков Стобиски, кој деновиве се најде во фокусот на јавноста со неговите изјави за трансродовите лица и ЛГБТИ-популацијата, на прес-конференција изјави дека протестот не е насочен против припадниците на ЛГБТИ-заедницата, туку исклучиво против содржината на двата закони чие усвојување, како што вели, сериозно би ги загрозило правата на 99 отсто од населението во земјава.
Епископот Стобиски вчера повторно ѝ се обрати на јавноста и преку видеоснимка ги повика граѓаните на излезност на денешниот собир.
„Имаме должност да ја разобличиме лагата, силно и јасно да ја изговориме и исповедаме вистината, но и да ги заштитиме децата и семејството и да ја одбраниме слободата којашто не ни е дадена тукутака, но за неа не некој друг, туку Христос има платено скапа цена. Премногу скапа за да станеме робови на луѓе, на некакви човечки идеологии спротивни на духот на евангелието“,
рече епископот Јаков Стобиски во своето видеообраќање.
Во пресрет на денешниот собир, епископот Дремвитски Давид синоќа на својот блог напиша дека е свесен за фактот оти државата е секуларна и дека црквата нема право да донесува закони во Собранието, но за разлика од државата, како што кажа, црквата има свои внатрешни правила.
Затоа, вели епископот, ќе треба внимателно да се запишат имињата на пратениците кои евентуално би ги поддржале предлог-законите за родова еднаквост и за матична евиденција, а потоа, како што додава, доколку посака, црквата може да одлучи на тие пратеници да бидат лишени од крштевки, венчавки, погреби и сите други богослужби.
Платформата за родова еднаквост и Мрежата за заштита од дискриминација, пак, го осудија повикот за протест на МПЦ-ОА, чија единствена цел, како што велат, е да се направи јавен притисок кон повлекување на двата предлог-закона, оценувајќи го како директен упад во секуларноста на државата и непочитување на Уставот, а пред сѐ на жените во земјава и непрепознавање на нивните реални животни ситуации.