-Европскиот предлог претставува солидна основа за градење сериозен, одговорен и државнички став за можноста која се отвора за нашата земја. Процесот за носење конечна одлука е транспарентен и со јавноста се споделуваат сите детали со цел информирањето да биде објективно од институциите на државата, истакнаа премиерот Димитар Ковачевски и министерот за надворешни работи Бујар Османи на средбата со дипломатскиот кор во земјава. Средбата е дел од најавената широка консултација која започна веднаш по денешното обелоденување на францускиот предлог.
На средбата, како што информира владината прес-служба, присуствувале амбасадорката на САД Кејт Мари Брнз, амбасадорот на ЕУ, Дејвид Гир, амбасадорот на Франција Сирил Бомгартнер, в.д амбасадорот на Обединетото Кралство на Велика Британија и Северна Ирска Џулија Смит, в.д амбасадорот на Италија, Марио Де Роса, како и заменик амбасадорот на Германија, Ото Граф.
„Ковачевски и Османи ги информираа амбасадорите за текот на широките консултациите кои Владата ги води со медиуми, експертски групи, политички аналитичари, коалициони партнери, опозицијата и останати партнери и соработници. Амбасадорите присутни на состанокот дадоа поддршка за транспарентниот начин на спроведување на процесот, како и за силните заложби на Северна Македонија и стратешките определби за соработка и партнерство со САД и ЕУ. Беше заклучено дека неопходно е и натаму да се градат и поддржуваат демократските вредности како единствена определба која води кон напредок, просперитет и подобри услови за живот на граѓаните во земјата“,
се наведува во соопштението од Владата.
Владата соопшти и дека премиерот и министерот оствариле средба и со граѓанскиот сектор, експерти од различни области, професори и политички аналитичари.
„На брифингот се дискутираше за европскиот предлог за просперитет на Северна Македонија. Премиерот Ковачевски упати благодарност за придонесот што го даваат граѓанскиот сектор и експертската јавност во овие клучни моменти за државата. При тоа премиерот Ковачевски посочи дека Владата партнерски низ дијалог и консултации носи одлуки во интерес на иднината на сите граѓани на Република Северна Македонија. Премиерот Ковачевски истакна дека Владата нема дилеми за стратешкиот правец на државата и одлуките што ќе се носат ќе бидат на прогресивната страна со јасна заштита на јазикот и идентитетот на државата да одлучиме дали сме на прогресивната страна“,
се вели во владиното соопштение.
*ПОВРЗАНИ ВЕСТИ
Маричиќ: Исполнето е нашето очекување да ги немаме историските прашања во преговарачката рамка
Османи: МНР ќе ѝ предложи на Владата да го прифати францускиот предлог
(ВИДЕО) За Мицкоски предлогот е неприфатлив: ВМРО-ДПМНЕ утре повика на протест пред Владата
Француски предлог: Кои се разликите меѓу стариот и новиот пакет?