Почна судењето во Основниот суд во Штип за двајцата штипјани кои во јануари тепале девојка во влез на станбена зграда.
Двајцата се товарат за сторено кривично дело насилство, за што е предвидена казна од шест месеци до пет години затвор.
*Поврзана вест: Полицијата ги уапси насилниците од Штип кои тепаа девојче
Момчињата на возраст од 23 и 26 години утринава со комбе од Истражниот затвор од Куманово пристигнаа во штипскиот основен суд.
Адвокатот Валентин Зафиров, бранител на едно од момчињата, пред да почне судењето изјави дека очекува фер судење.
*Поврзана вест: Штипското обвинителство отвори предмет против двајцата насилници кои тепаа девојче
Тој нагласи дека поради посебните мерки против ширењето на коронавирусот не можел да оствари контакт со својот клиент во затворот во Куманово бидејќи бил во самоизолација со што не можел да изгради комплетна стратегија.
„Судиите да не потпаднат под атмосферата што се создаде во јавноста, да ги ценат правилно околностите, да го ценат ЗКП, така да постапуваат и да донесат соодветна одлука“,
вели Зафиров.
*Поврзана вест: Судот во Штип одреди мерка притвор за насилниците кои тепаа девојка
Инаку, момчињата насилството го снимале на мобилен телефон, а снимката на социјалните мрежи беше објавена на 2 април по што молскавично се прошири на социјалните мрежи.
Во изминатиот период со жртвата, 21-годишната девојка, работеа, а и поддршка доби од стручните тимови на Центарот за социјални работи Штип и невладината организација ЕХО.