Во Основниот граѓански суд во Скопје почна судењето за тужбата која ја поднесе шефицата на Обвинителството за гонење организиран криминал и корупција Вилма Русковска против ВМРО-ДПМНЕ. Русковска ги тужи за клевета поради изборните спотови во кампањата за предвремените парламентарни избори во кои се споменува таа.
Денеска се одржа подготвително рочиште, а адвокатот Панче Тошковски од ВМРО-ДПМНЕ изјави дека станува збор за неоснована тужба бидејќи во случајот се работи за нивното право на слободно изразување на мислата кое е загарантирано со членот 10 од Европската конвенција за човекови права и слободи.
„Се поставува прашање што е побитно? Дали јавниот интерес, дали потребата граѓаните да бидат информирани, потребата на граѓаните на Република Македонија да можат да постават одредени прашања во саркастични и провокативна форма? И воедно заштитата на членот 10, или заштитата на приватната репутација на еден јавен функционер која што патем е платена од пари на граѓаните на Република Македонија, извршувајќи ја функцијата како што ја извршува обвинителката за организиран криминал“,
изјави Тошковски.
Тој пред медиумите изјави дека Русковска како доказ доставила вештачење од невропсихијатар во кое пишува дека кај неа има лутина кон тужените, анксиозност и загриженост. Тоа, според него, ја доведува во прашање нејзината професионалност.
„Неспорен факт е дека истата, во рамки на доказот, тврди дека има лутина кон тужените, анксиозност, загриженост. И тоа како ги става под знак прашалник објективноста и непристрасноста во сите предмети кои се водат против опозицијата и истакнати членови“,
вели Тошковски.
Тужбата на Русковска е против ВМРО-ДПМНЕ и нејзината коалиција „За обнова на Македонија“, како и против Игор Јанушев како овластен претставник на коалицијата и Христијан Мицкоски како претседател на партијата.
Русковска во нејзината последна изјава за тужбата рече дека прво побарала извинување, а откако не го добила, решила да тужи.
„Јас прво побарав извинување и повлекување на спотовите додека траеше предизборната кампања. Тоа не се случи и од тие причини преку адвокат ја поднесов тужбата. Сметам дека таа сума е реален износ, повеќе симболичен, а доколку со правосилна пресуда ми биде досуден износот, сакам да го донирам во СОС Детското село затоа што сметам дека во оваа пандемија може малку и се заборави на оваа институција, а знам дека тие опстануваат од донации“,
изјави Русковска на 10 септември.
Името на обвинителката се споменуваше во два спота на ВМРО-ДПМНЕ. Во еден беше прикажана мајка како чита приказна пред спиење на своето дете и споменува име „Вилма“, која дава можност политичарите да одберат обвинение за своите противници. Во друг спот, пак, се користеше нејзина и фотографија од судијката Добрила Кацарска, а ВМРО-ДПМНЕ велеше дека на тој начин сака да покаже дека тие станале синоним за неправдите на Зоран Заев и „Луј витон“ правниот систем.