Пред почетокот на средбата дел од лидерите на партиите дадоа изјави во кои секој од нив кажа со каков став ќе настапи и кои се прашањата за кои ќе сакаат да се разговара
Во Собранието почна средбата на премиерот и претседател на СДСМ, Димитар Ковачевски со лидерите на парламентарните политички партии, на која треба да се разговара за европскиот пат на земјава, како и за одлуките што во иднина треба да се носат со широк политички и општествен консензус.
На средбата присуствуваат лидерите на сите парламентарни групи во Собранието, освен лидерот на Беса, Билал Касами и на Левица, Димитар Апасиев.
Пред почетокот на средбата дел од лидерите на партиите дадоа изјави во кои секој од нив кажа со каков став ќе настапи и кои се прашањата за кои ќе сакаат да се разговара.
Лидерот на Демократски сојуз, Павле Трајанов, вели дека на лидерската средба ќе бара признавање на македонското малцинство во Бугарија. Тој вели дека нема ништо против внес на Бугарите во Уставот, но тоа да биде на реципрочна основа, а Бугарија да го признае македонското малцинство во оваа земја, за тие таму да може да отвораат здруженија.
„Од името на Демократски сојуз ќе побарам прва точка за која ќе се разговара да биде да упатиме силна заедничка порака до Бугарија да ги признаат Македонците како национална припадност и да ги признаат да можат да ги остваруваат сите свои права. Македонците да имаат право да се здружуваат, да формираат културни клубови, други здруженија, асоцијации, да можат да формираат и политички партии и да може да ги негуваат своите национални, културни, јазини обележја што ја карактеризираат една нација“,
рече Трајанов.
Тој, исто така, нагласи и дека ќе бара и сеопфатни реформи на изборното законодавство, за Македонија да биде една изборна единица, а не ја исклучи можноста и да го постави и прашањето за предвремени параламентарни избори.
Претседателката на ДОМ, Маја Морачанин рече дека очекува денешната лидерска средба да биде конструктивна, но кажа дека не очекува денеска да се постигне договор.
„Не очекувам дека денеска ќе се постигне договор, имајќи ги во предвид изјавите од опозицијата дека тие бараат дополнителни гаранции за промена на Уставот, но добро е да заеднички да разговараме за стратешки прашања важни за државата и народот. Не знам кои се гаранциите кои опозицијата ги бара, па потоа можеме да дискутираме кој може тоа да го обезбеди“,
рече Морачанин пред влегувањето на закажаната лидерска средба во Собранието.
Таа смета дека условувањата никому не носат добро, бидејќи темата на денешната средба е европската интеграција на земјава.
„Ова барање на опозицијата за предвремени избори датира уште од локалните избори. Фокусот треба да ни биде пребродување на економската криза. Наша заложба како ДОМ е овие реформи неопходни за државата, поинтензивно да се спроведуваат во државата“,
додаде лидерката на ДОМ.
Лидерот на Демократската партија на Албанците (ДПА), Мендух Тачи изјави дека на лидерската средба ќе настапи без никакво условување, потенцирајќи дека сега не е моментот за рокови и услови. Според него на средбата треба да се разговара за уставните измени, односно деблокирање на процесот на интеграција на земјава во ЕУ.
„Ова е многу важна тема, добра иницијатива, конструктивна, се надевам дека со добар дијалог ќе постигнеме договор. Инаку, друг пат и начин немаме да го деблокираме што се вели засекогаш евроинтеграцискиот процес“,
рече Тачи.
Во однос на условот ако се отвора Уставот за во него да се внесат Бугарите, истовремено да се изврши и интервенција и наместо формулацијата „јазик кој го зборуваат 20 проценти од граѓаните“ да се стави „албански јазик“, Тачи вели дека тоа е идеа на ДПА, „украдена од други“.
„Јас секогаш велам кажете дека сум полош од сите и не ме ставајте во такви формулации. Јас не знам кој се тие останати политички партии на Албанците. Ако мислите дека тоа е Беса за мене тие сè уште се дел од коалицијата со СДСМ. Да тоа е многу лошо кога книгата што вие ја пишувате ќе ја предава некој друг универзитет. Тоа е крадење на една платформа и на една идеја. Мислам дека е време да се разговара јавно за идентитетот на Албанците да стане дел од правните норми на нашата држава, второ мислам дека не е моментот за услови за уцени и трето не е моментот да му се дава оружје в рака на противникот. Јас разговарав со Ахмети и ќе продолжиме да разговараме, но ние немаме никаков услов и тоа треба многу јасно да се каже. После ќе разговараме исто како што разговаравме со Ахмети со нашиот коалиционен партнер и со македонската опозиција. Имаме силни аргументи, но не е моментот да се поставуваат услови или рокови“,
изјави лидерот на ДПА Тачи.
Лидерот на Алтернатива, Африм Гаши пред почетокот на лидерската средба во Собранието кажа дека неговата партија сто проценти стои позади евроинтеграцискиот процес на земјава и оти ќе даде поддршка за што побрзо отворање на поглавјата со ЕУ. Тој рече дека Алтернатива нема да поставува услови за спроведување на уставните измени, а оти тоа не треба да биде пракса во делувањето во македонската политика.
„Јас доаѓам денеска за да дадам поддршка. Нормално е да разговараме и за нашиот предлог-амандман. Не сум запознаен за што ќе се разговара на денешната средба. Нема да условуваме во никој случај. Ниту сега, ниту некогаш. Алтернатива не е партија која условува. Сакаме да воведеме принцип тој начин на условување да заврши како комуникација меѓу нас“,
рече Гаши пред влегувањето во Парламентот на денешната закажана лидерска средба помеѓу политичките партии.
Лидерот на партијата Беса, Билал Касами, претходно денеска изјави дека неговата партија нема да присуствува на лидерската средба што ја свика премиерот Димитар Ковачевски, а која е закажана за денеска напладне во Собранието.
„Движењето БЕСА нема да учествува на денешната лидерска средба бидејќи сметаме дека оваа средба е свикана за да се спаси ДУИ од одговорностите“,
рече Касами на прес-конференција.