Според податоците, најголем дел од заболените се заразиле локално во регионот на Скопско Поле и Велес без патување надвор од државата, при што дури 75% од заболените се лица на возраст над 60 години кај кои доминира машкиот пол
Министерството за здравство информираше дека во земјава нема нови лабораториски потврдени случаи на западнонилска треска. Сите последни примероци од суспектни пациенти се негативни на PCR-тестирањето во Институтот за јавно здравје (ИЈЗ), а на Клиниката за инфективни болести во Скопје нема новопримени пациенти со сомнеж за ова вирусно заболување.
До крајот на јули во Македонија официјално се потврдени вкупно 13 случаи на западнонилска треска, од кои дури 10 пациенти побарале хоспитализација. Клиничката слика кај најтешките случаи е алармантна, па така три лица се во критична здравствена состојба и дишат со помош на механичка вентилација во одделот за интензивна нега поради развиена тешка невроинвазивна форма на болеста, односно вирусно воспаление на мозокот и мозочните обвивки.
Годинашниот бран започна релативно рано со првиот потврден случај во земјава и во цела Европа уште во мај кај 55-годишен маж од Велес, а податоците на ИЈЗ откриваат дека најголемиот дел од заболените се заразиле локално во регионот на Скопско Поле и Велес без патување надвор од државата, при што дури 75% од заболените се лица на возраст над 60 години кај кои доминира машкиот пол.
Епидемиолозите појаснуваат дека регистрираните случаи ја претставуваат само видливата слика на една многу поголема реалност бидејќи според Светската здравствена организација дури 80% од инфицираните со вирусот на Западен Нил воопшто немаат симптоми, околу 20% развиваат само лесна форма слична на настинка, додека помалку од 1% завршуваат со тешки невролошки компликации.
Ова заболување не е нов феномен во Македонија каде за првпат е лабораториски потврдено во 2011 година, по што до крајот на 2025 година се регистрирани вкупно 54 случаи и пет смртни исходи, но експертите посочуваат дека екстремно топлите лета, благите зими и влажните пролетни периоди создаваат идеални услови за пораст на динамиката и размножување на домашните комарци кои се главни пренесувачи на вирусот од птиците на луѓето.
Како одговор на ескалацијата кон крајот на јули, Министерството за здравство и Центарот за јавно здравје – Скопје спроведоа вонредна дополнителна терестричка дезинсекција со фокус на критичните подрачја и во радиус од 200 метри околу домовите на заболените.
Бидејќи за овој вирус не постои специфична вакцина ниту антивирусна терапија, лекувањето во болниците е исклучиво симптоматско, па надлежните апелираат на максимална претпазливост преку чистење на изворите на застојана вода во дворовите каде комарците ги несат јајцата, користење мрежи за прозорци и репеленти при престој на отворено, бидејќи иако состојбата во моментов мирува, сезоната на комарци трае до рана есен и будноста не смее да опадне.