Од Факултетот за музичка уметност од Скопје на Фејсбук објавија апел за информации во врска со нивната колешка Сара Пројковска која е придружен вокал на групата ДНК
Тапанарот на групата ДНК, која синоќа имала настап во дискотеката во Кочани, Горги Горгиев од Струмица, е меѓу настраданите во пожарот, информира на својот фејсбук-профил градоначалникот на Струмица, Костадин Костадинов.
„Ах бре убаво дете, сите списоци, сите болници баравме за да те најдеме, само да ни кажат дека си тука… Со неизмерна тага ја примив веста за трагичната загуба на нашиот сограѓанин, Горги Горгиев, кој го загуби својот живот во страшниот пожар во Кочани. Струмица загуби талентиран музичар, пријател и човек со големо срце, кој преку својата музика ширеше радост и емоции. Во овие тешки моменти, моите мисли и молитви се со неговото семејство, најблиските и сите кои го познаваа и сакаа. Нека почива во мир, а неговата музика и споменот за него вечно да живеат во нашите срца“,
напиша Костадинов на Фејсбук.
Од Факултетот за музичка уметност од Скопје на Фејсбук објавија апел за информации во врска со нивната колешка Сара Пројковска која е придружен вокал на групата ДНК.
Во изјава за МИА, Васко Спасоски од тимот на бендот ДНК информира дека Владимир Блажев-Панчо има изгореници на лицето и на раката и е на кислородна поддршка, но е свесен.
Засега нема информации за состојбата на неговиот колега Андреј Ѓорѓиевски.
Во пожарот во дискотеката „Пулс“ во Кочани загинаа најмалку 59 луѓе, а 155 се повредени. За четири лица е распишана централна потерница, информираше министерот за внатрешни работи Панче Тошковски.